Den kaso di korupshon polítiko na St.Maarten

PHILIPSBURG.-Ministerio Publiko na St. Maarten a yega na un dil ku e polítiko Theo Heyliger eks lider di UPP i promé ku esei lider di Partido Democraat di St.Maarten. Ta trata di e kaso ku a haña e nòmber Larimar, den kua hustisia ta akusá Heyliger di korupshon. E kaso a kuminsá na mart 2017 i despues di haña e polítiko kulpabel di tuma soborno a kuminsá un otro kaso pa konfiská tur loke el a gana ilisitamente. RST bou di mandato di prokurador general a dirigí e investigashon.

15 di mei 2020 Heyliger a tende sentensia den su kontra di 5 aña di prisòn pa tumamentu di soborno i tambe labamentu di plaka. Korte a determiná ku e polítiko a enrikesé su mes riba kustia di pueblo di St.Maarten. Tantu Heyliger komo fiskal a apelá e veredikto.

Na mes momentu ku e investigashon kriminal tabata kana a start e investigashon pa wak loke el a optené di forma ilegal. E investigashon a demostrá ku di bèrdat Theo Heyliger a enrikesé su mes.

Fiskal i Heyliger a haña otro den un akuerdo kaminda Theo Heyliger ta paga OM un suma di 5 mion dòler i tambe e ta rechasá su derecho pa kobra plaka di hür di propiedatnan. Di e forma aki Heyliger ta renunsia e propiedatnan ku el a gana di forma ilegal.

E suma lo bai pa fondo di kriminalidat. E echo ku e akusado a opta pa yega na un akuerdo ta enserá ku ku no ta sigui ku e proseso largu den korte. Ku e akuerdo aki por indiká ku e kaso ta sera dia 1 novèmber. Mas detaye den edishon di EXTRA.