WILLEMSTAD – Un biaha mas EXTRA ta bin ku otro inovashon pa su página di web ku ya ta entre esnan mas bishita aki na Kòrsou i sigur esun mas popular di media lokal. Entrante awe Extra ta bai kuminsá ofresé e servisio tantu na promotornan di evento, organisadónan di fiesta i e kumpradó nan mes pa por kumpra nan karchi fásil via Extra Online. Esaki ku sosten di e prestigioso empresa TicketsCaribbean. E página di web di EXTRA ta risibí tur luna un promedio di 3 mion pageviews i 150 mil bishitante úniko. Algun tempu pasa EXTRA a lansa e página di flor riba su página di web i ya ta hopi popular. Bishitante nan primordialmente for di Ulanda pero tambe Kòrsou ta hasi usa di esaki pa nan pedido di krans pa defuntu fásil via online i esaki ta keda entrega segun petishon. Ku e parti nobo aki di kumpra karchi entradaonline, EXTRA ta sigui amplia su komersio digital usando e tráfiko inmenso riba e página. Pa hasi uso di e página aki djis klik riba e link athunto https://extra.cw/extra-tickets/.

EXTRA ta sumamente kontentu ku por a sera e aliansa aki ku TicketsCaribbean ku ta un empresa ku a keda funda for di 2014 ku meta pa yuda promotornan di evento i atrakshonnan turístiko den Karibe bende nan karchi entrada ku mas ku 30 mion turista ku ta bishita e region aki pa fakansi tur aña. TicketsCaribbean ta e partner konfiabel pa tantu e promotor chikitu komo esnan grandi na Aruba, Boneiru, Kòrsou, Colombia, Santo Domingo i Sürnam. TicketsCaribbean tin e vasto eksperensia di bende míles di karchi online pa diferente evento manera entre otro, festivalnan di músika, konsierto, eventonan komersial, workshop i eventonan via Zoom. Algun evento popular ku nan a presta nan servisio ta Festival di Tumba, CTB i Aruba Summer Music festival.

Ku e aliansa nobo ku ta kombiná e tráfiko enorme riba www.extra.cw huntu ku e eksperensia di benta karchi online di TicketsCaribbean pa yega na mas tantu potensial kliente i fasilitá nan e kompra di nan evento preferí.

E promé evento ku por kumpra karchi via di e aliansa nobo aki entre EXTRA i TicketsCaribbean ta e konsierto di Oreo, Buleria i The Diamond Band dia 29 di yüli na Boneiru den Stadion di Rincon komo selebrashon di 85 aña di eksistensia di ABVO.