E klup aki a keda fundá na 18 òktober 1980 i di kual a keda rekonosé dor di Gobièrnu por medio di e Dekreto Gubernamental fechá 11 mart 1981 No. 52.

Fundador di TIDIKO aki tabata sr. George “Jossy” Broos kual tabata un gran fanátiko di e deporte di tiru. E promé direktiva di e asosashon aki tabata konsistí di señornan Mario Perret Gentil, Pedro v.d. Dijs (Papito), Hendriks Abraham, G. van Grieken i E. Berkemeyer. Atraves di e aña nan TIDIKO a konosé e siguiente Presidentenan: Mario Perret Gentil, George Broos, Selvi Laurens i aktualmente sr. Ke-Chi Chang.

E miembronan di e klup aki inisialmente tabata praktiká e disiplina di “Olympic Trap-, Double Trap- i Skeet shooting” pero atraves di tempu e klup aki a amplia e posibilidat pa praktiká mas disiplina di e deporte di tiru manera: air pistol, air rifle, free pistol, standard pistol, centre-fire, practical shooting i steel challenge. Remarkabel ta  ku na diferente okashon algun miembro di e klup aki a sa di destaká titulando kampion lokal i/o klasifikando den e mihó nan di Mundu durante kompetensianan na nivel regional i tambe na nivel internashonal durante weganan manera Pan American Games i Centro Americano del Caribe.

‘Ups and downs’

E deporte di tiru na Kòrsou a konosé temporadanan di “ups-and-downs”. Spesialmente despues di e kambionan estatal a nase konfushon ku finalmente a limitá e tiradónan na Kòrsou su partisipashon na nivel internashonal (nivel Olímpiko). Un faktor ku a kontribuí na ménos práktika di e deporte ta e defisiensia den e sistema di pèrmit nesesario pa por tin un arma. Sinembargo aktualmente por konstatá un interes kresiente atrobe den e deporte di tiru.

Direktiva di TIDIKO su vishon ta pa krea posibilidat pa su miembronan por praktiká e deporte di Tiru den un ambiente sigur i ta stimulá su miembronan pa praktiká e deporte aki na tur nivel: lokal, regional i internashonal. Direktiva ta enfoká su strategia riba tur lokual ta nesesario pa garantisá e vishon aki.

Aktualmente TIDIKO ta den un proseso di reorganisashon den kual a implementá kambionan nesesario na nivel statutario i organisatorio i ta invirtiendo dirigí den amplia konosementu teóriko riba sierto temanan relevante den kuadro di práktika di e deporte aki. Tambe ta hasiendo uso di mas teknologia moderno pa stimulá e disiplina i bon práktika di ‘shooting skills’.

Inovashon di TIDIKO

Ke-Chi Chang ta presidente aktual i Terry van Ommen bosero di e klup. Tin hopi plan, inovashon ku TIDIKO tin den tapara. Ke-Chi a splika ku nan a adoptá e tiramentu di Steel Challenge esta tiramentu riba plachinan di heru, kaminda básikamente ke tira mas lihé posibel riba e 5 plachinan. E sistema aki ta lantando hopi positivo partikularmente na Merka. Ke-Chi a kaba di bin aña pasá aprel  di Merka kaminda el a partisipá na un un kompetensia mundial di Steen Challenge ku kasi 800 tiradó. E evento a tuma 3 pa 4 dia largu pa tur e partisipantenan por a demostrá nan kapasidat. E tabata hopi interesante i Ke-Chi a logra su sertifikado pa por introdusí e Steel Challenge aki na Kòrsou tambe. A base di esei a kuminsá ku e Steel Challenge na Kòrsou. Ta praktiká tur djadumingu mainta i e ta meskos ku Drag Racing pero ku un arma. E disiplina ta enserá ku bo ta haña 5 bùrt riba 8 ‘stage’ i di e 5 biaha ei e 4 mihó tempu ta keda konta i esei ta bira e skor final. E worldchampionship ta para na 8 pa 10 sekònde.

Deporte di tiru for di hopi tempu

E deporte di tiru segun Ke-Chi ta un deporte ku hende ta praktiká for di “stone age”. Djis kòrda kon komo mucha nos ta bòltu bleki ku piedra. Ta e mesun konsepto pero usando un pistol. Tur wega di bala ta mek bon. I manera Terry van Ommen a bisa, e deporte di tiru aki ta krea un adrenalina ku hopi hende no por imaginá nan mes. E promé biaha ku tene e skopèt pa promé biaha ta e ora ei e adrenalina ta kuminsá lanta i sigui krese.

Bira miembro...

Pa bira miembro di Tiradónan di Kòrsou ta un proseso. E presidente a splika ku komo ta atendé ku arma di kandela tin un proseso di screening pa tene seguridat riba kancha. Bo ta apliká i despues di screening ta keda permití na e klup i pasa edukashon di seguridat riba arma, EHBO i e reglanan i disiplina ku ta praktiká, e komando riba kancha. E proseso ei por bai lihé komo introdusido. I segun esei ta sosodé bou di supervishon di un instruktor i despues di a pasa e kursonan i bo ta kualifiká pa tira riba bo mes. Pa tin un arma den bo mes poder si tin di karga e proseso di petishon. I un di e kondishonnan ta ku bo mester ta sigur un aña miembro di un klup i demostrá e interes i habilidat di tira.

Tin mas kostoso

E deporte aki ta unu kostoso i en partikular riba un isla manera Kòrsou kaminda tin di importá tur kos. Pero kompará ku otro deporte e ta relativo i espesial kompará ku un dragracing por konsider’é barata i kompar'é ku beisbòl e ta karu. E kontribushon mes di miembresia ta di 15 florin pa luna i ora bo bai tira ta dependé kuantu bala usa. Terry a splika riba e punto aki, ku e deporte di tiru ta dependé kiko e hende mes ke, ta kost’é òf no. Meskos ku e deporte di dragrace, e hende ta kumpra outo i poko poko ta traha riba dje pa e kore duru. Meskos ku den tiru, ta e hende mes ta disidí ku kisas e ke un holster di kueru òf unu mas barata.

No mas olímpiko

Tempu e klup a keda lantá nan tabata hopi konsentrá riba disiplinanan olímpiko. Pero den kareda di 2010 pa 2012 e traspaso di nos sistema gubernamental a bira tal forma ku Kòrsou no a keda rekonosé komo un pais riba su mes. I  komité olímpiko a duna e oportunidat pa hasié pero e no a sosodé i Kòrsou a kai afó. I tiramentu olímpiko a bira unu kaminda aki no por inskribí su mes mas den e kompetenshanan ei di tiru. Riba kompetensia internashonal si TIDIKO ta tuma parti entre otro nan ta afiliá na e organisashon United States Practical Shooters Association ku tin un un “Yu” ku yama Steel Challenge Association  i einan TIDIKO ta afiliá i einan praktiká e tipo di disiplina aki na nivel eksterior.

Pa loke ta TIDIKO aki na Kòrsou, sr. Chang a splika ku nan ke promové e deporte di tiru i komo e otro disiplinanan a kai afó nan a introdusí e Steel Challenge pa asina den futuro por amplia e Steel Challenge pero tambe e tiramentu práktiko i purba influensiá miembronan pa bin kancha bèk i asina reintrodusí tiru olímpiko tambe.

Maneho nobo ta un estorbo pa e klup

Pa loke ta e maneho nobo di arma sr. Chang a bisa ku esaki ta influensiá nan drástikamente. Ta lástima ku a bin un maneho nobo ku gran parti nan ta apoyá pero tin diferente aspekto den e maneho nobo ku ta opstakulisá e deporte di tiru. Nan ke pone por ehèmpel e edat 18 aña pa por partisipá den e klup. Pero internashonalmente e kompetenshanan internashonal ta konta ku hóbennan di 18 pa 19 aña i nan eksperensia ta hopi amplio pasobra nan a kuminsá hopi tempran. Esei ta sera nan posibilidat di krese. Tambe tin otro diskushon ku ta e Compos Mentis; e ta un momentu opname. Si kuminsá implementá na entrada di miembronan, kisas nan lo por pas’é pero no tin garantia ku e ta mantené e Compos Mentis ei despues. Por mira hopi biaha den hustisia un dia e hende ta bon bei pero siguiente dia ta echa un baina, segun sr. Chang a bisa Djasabra. Esei ta argumentonan ku nan ta deliberando riba dje. Nan a tuma kontakto ku instansianan na Ulanda pa sa nan posishon ounke esei no ta stroba ku nan por sigui propagandá e klup i e deporte di tiru.

Hopi interes di hóbennan

E klup aktualmente ta hendenan grandi pero nan ta mirando e interes di hóbennan. I TIDIKO ta promoviendo su mes por ehèmpel ku wèpsait nobo i ta hañando hopi reakshon di hóbennan pa por forma parti di e klup. Terry van Ommen a bisa ku tin hopi hende ke purba i pa despues por bira miembro. I p’esei pronto por spera un dia habrí di TIDIKO pa por sinti e deporte di aserka. Entre otro nan lo por tuma parti na dia di Rei e aña aki. E klup ta ‘strak’ pero tòg moderno.

Chang a mustra ku e steel challenge ta masha popular kaminda asta a traha un vershon virtual kaminda por praktiká i trein kon pa move di ‘target’ pa ‘target’. E ta ménos kostoso pasobra no ta gastando bala djis pa praktiká moveshon. Loke ta interesante ta ku bo ta keda husgá a base di bo kategoria.