...Tres wardadó di prezu a risibí prohibishon pa subi tereno di SDKK...

Tim di krísis mester kana trayekto di integridat na prizòn

WILLEMSTAD.- Minister di Hustisia, Quincy Girigorie a instalá un tim di krísis na Sentro di Detenshon i Korekshon Kòrsou ku mester kana un trayekto di integridat na e sentro di detenshon. Sinembargo ya kaba a duna 3 wardadó di prezu prohibishon pa subi tereno di prizòn, pendiente un investigashon mas aleu. Segun EXTRA por komprondé un òf mas di e wardadónan di prezu aki ta miembro di e grupo di servisio di ABVO na prizòn. E tim di krísis ta konsistí di miembronan di e tim di maneho huntu ku 4 otro eksperto. Motibu pa a instituí e tim ta e echo ku personanan detené na e baraknan di ilegal ta keda hui for di e sentro. E último huida siman pasa di 21 persona di nashonalidat Venesolano tabata notabel pa e echo ku niun wardadó di prezu a aktua na momento di e huida. E Venesolanonan a bres e baranan di heru di un bentana i asina a bula for di e baraknan ku nan ta aden, pero despues a laga kana sali trankil sin hasi un intento pa interseptá nan. Minister Girigorie tabatin kontakto tambe kaba ku e sindikatonan riba e pasonan ku el a disidí di tuma na prizòn. Awe mèrdia 2’or e minister tin un konferensha di prensa pa duna mas detaye di e situashon reinante na prizòn i pasonan ku e ta tumando pa trata na restourá òrdu den e instituto i alabes garantisá seguridat den e instituto. Sinembargo awe mainta 10’or tabatin un reunion di parlamento planiá huntu ku minister Girigorie riba hustamente seguridat den kadena hudisial. Ta un reunion ku a suspendé for di 23 òktober 2018 i ku ta plania pa kontinuá 4 yüni awor. A trata na hala e reunion aki dilanti pa awe mainta, pero aparentemente e minister lo tin otro obligashonnan ku e mester kumpli kuné i no por a presentá den parlamento awe mainta.