WILLEMSTAD.- Kasi niun siman Kunuku Man i su tim no ta kontentu ku loke nan topa kantu di kaminda. Esei ta di komprondé i ta lógiko, ya ku e grupo sa bai limpia e mesun sitio despues di algun siman i ta topa sushi atrobe, loke ta hasi e situashon un tiki frustrante.

E fin di siman ku a pasa e tim di Kunuku Man a pasa un biaha mas na Berg Altena, por bisa 1,5 kilometer kada banda, i aki nan a topa atrobe ku hopi porkeria.

Den e kaso aki a rekohé 650 bòter di bibida alkohóliko, bon pa 122 kilo i ku a bai pa banko di glas; 300 bleki di aluminio, ku a pisa 4 kilo, kual a bai pa resiklahe; mas aleu 350 bòter di plèstik, ku a pisa 7 kilo ku a bai pa resiklahe; tambe a rekohé otro tiponan di plèstik, na rason di 11 kilo i ku a bai pa resiklahe. Finalmente a keda 44 kilo di sushi komun ku si a bai pa landfill. E total na sushi tabata 188 kilo, ku defakto ta un bèrgwensa.