WILLEMSTAD.- Ayera e Tim di Vakunashon ku ta konsistí di epidemiólogo sra. Iralice Jansen i Dr. Jerry Semper a tene un seshon di informashon den prisòn pa e prezunan.
Segun nos a komprondé di prisòn ku e mainta a kana hopi bon, kaminda tabata tin oportunidat pa representante di tur e blòknan risibí kontesta riba preguntanan di parti prezunan hasí na e ekspertonan di Tim di Vakunashon. Nan a tuma e informashon i hiba esaki p’e prezunan.
Ya kaba dia 11 di aprel, e di dos grupo di prezu i personal a vakuná den prisòn. Un kantidat di mas o ménos 250 kliente/prezu i 150 miembro di personal a tuma nan promé vakuna kontra di COVID-19 riba dicho dia. Nan a haña e vakuna di Pfizer. E kantidat di prezunan ku a vakuna ta mas òf ménos mitar di e poblashon di prezu den SDKK, miéntras ku di e personal, hopi a vakuná pafó di prisòn kaba.
Gerensia di prisòn ta sigui motivá i duna informashon na e klientenan ku no a vakuná pa nan por tuma e vakuna den futuro. Hustamente esei a tuma lugá ayera.
Te ainda tres detenido a haña COVID-19 den prisòn i a keda isolá pa evitá ku e ta plama. E personal di prisòn tambe a keda afektá ku COVID-19.
Gerensia di prisòn sr. Urny Floran a bisa prensa ku tur loke e representantenan di kada blòk a haña na informashon, a keda graba i lo bai pas’é den tur blòk.
Mas aleu el a bisa ku e situashon aki no ta unu bon ni p’e detenido ni e komunidat sigur pa e parti di resosialisashon di prezunan. Ademas e prezunan no ta hañando bishita.
Ora suavisá medidanan i prisòn ta vakuná ta mira kon ta sigui kana.