WILLEMSTAD.- Ayera durante di un pènel ku gobièrnu a tene pa komunidat hasi pregunta riba e proseso di Vakunashon, ta hopi pregunta a ser hasí si hende na estado por vakuná. E miembronan di e tim di vakunashon ku tabata presente den e pènel a splika ku no por duna palabra ku hende na estado por vakuná awor aki. Ainda e investigashon ta andando riba hende embarasá i muchanan bou di 18 aña. Apesar di esaki sifranan di investigashon ku a keda publiká algun dia pasá ta mustra positivo, pero tin di warda un tiki mas. Esaki ta loke ku e miembronan di e tim di vakunashon den e pènel  médiko dr. Jerry Semper, inmunólogo dr. Ashley Duits i sra. Lydia Regina botikario a splika.

Nan a indiká ku siensia no tin sifra i e no a wòrdu di tèst ku e vakuna tin efekto sekundario pa hende na estado. Sinembargo si ta na estado i tin enfermedat ku ta hasi riesgo mas haltu, esta diabétis ku ta fèrfelu pa kontrolá, i òf ku asma, ta kunbiní vakuna na estado. Sinembargo e pènel ta konsehá e damanan embarasá ku ta den tal posishon pa tòg konsulta ku nan dòkter di kas i ginekólogo pa yega na e desishon korekto.

E pènel a indiká ku siman pasá a sali sifranan di investigashon di vakuna serka mucha i hende na estado. E sifranan ta mustra ku no tin indikashon di algu robes, pero ainda mester warda pa tin investigashon sigur ku no tin efekto.

Mas aleu e pènel a splika ku remedi natural manera konosé den boka di pueblo no tin ningun investigashon hasi ku remedi natural por ser usá den bringamentu kontra COVID-19. Konstantemente ta tende gorgel ku awa di laman, òf awa ku salu, usa gèmber, pero tin nada ku ta bisa esaki nan ta kombatí COVID. E arma nan probá pa siensia kontra COVID ta mondkapje, laba man i usa handsanitizer.

“China ta un lugá ku ta usa hopi remedi tradishonal, i nan ta bisa awor aki ta mihó vakuná. Nan ta trahando 5 vakuna pa kaba ku e  problema aki mas lihé posibel”, dr. Duits di e pènel a deklará.

Algu ku a bin dilanti ta ku ora vakuná na bo wea di funchi por saka un klir ku den 24 ora lo disparsé bèk. “Esaki ta un bon señal pasobra ta den e klir e sistema di defensa ta rekonosé e vakuna. Sistema di defensa ta konsistí di antikurpa esta proteina ku ta sirkulá den sanger i sélulanan. I den e klir tin sélulanan. Si haña klir despues di vakuna ta hopi bon pasombra ta den e klirnan e sélulanan ta”, dr. Semper a splika.

(Foto na Israel)