Den kaso asesinato di viktima chines na Mirla Platéwèg 10 aña pasá

 WILLEMSTAD.- Relashona ku e kaso di Vernond Rombley ,  tim hulandes di Instituto Forensiko  Hulanda (NFI), ta na Kòrsou pa nan mes hasi e investigashonnan nesesario di e asesinato lamentabel di e viktima chines, ku a tuma lugá despues di 10 aña. Ayera e tim fo’i den oranan di mèrdia te den oranan di anochi tabata na e sitio pa hasi e investigashon.

Dia 3 di òktober último a hasi nèt 1 aña ku e kaso di Vernond Rombley a keda  trata den revishon na Hof, despues ku Rombley a keda insistí ku e ta inosente i ku ta gaña el a gaña ku e ta esun ku a tira e chines mata.

Ta trata di e kaso di atrako ku konsekuensia fatal ku a tuma lugá  20 di desèmber 2014 na Wah Mei minimarket den Mirla Platéweg. Pa e delito aki a sentensiá Rombley na 15 aña di prizòn i pago di 45.000 florin  pa daño i perhuisio. E tribunal di korte di apelashon a enfatisá  riba e mensahenan di ‘WhatsApp’ ku Rombley a manda pa algun amiga , bisando ku ta é a kometé e atrako. Sinembargo, for di su detenshon el a  insistí ku e no tin nada di aber ku e delito i ku ta blòf e mensahenan tabata.

Su kaso a keda presentá na Knoops’ Innocence Project na 2017 i despues di hopi análisis i diferente investigashon, abogadonan Knoops huntu ku abogado Vaders, konvensí di su inosensia, a hasi un petishon na nòmber di Rombley serka Korte Komun pa revisá su kaso. Hof a trata e petishon aki dia 3 di òktober 2023 i 14 di novèmber, ta hasi 1 aña ku Hof a yega na un sentensia provishonal. Hof a disidí ku no ta otorgá revishon di e kaso ainda i no ta suspendé e detenshon di Rombley manera e defensa a hasi petishon pe. Hof a pidi pa laga NFI midi estatura di e atrakadó i esun ku a tira na aña 2014 i ademas evaluá e método ku dos otro profeshonal a usa ora nan a midi e estatura di e atrakadó. Pero e diferensia den estatura no tabata e úniko punto ku abogadonan di e Innocence Project a presentá pa ilustrá ku Rombley no ta e atrakadó i esun ku a tira.

Banda di esaki e sospechoso riba imágennan di kámara, no tabatin kabei rasta bou di e mùts riba su kabes, siendo ku Rombley si tabatin kabei rasta te na skouder, ku di ningun manera lo no por a tapa ku e mùts. Ademas NFI a investigá vários karakterístika di kara di tantu e atrakadó komo di Rombley i a konkluí ku tin diferensianan ku por mira bon kla. Esaki ta e motibu ku e tim mes a bin Kòrsou pa asina hasi tur e investigashonnan nesesario i yega na un konklushon.