WILLEMSTAD.- Inspektor General di Salubridat a instalá un tim pa investigá morto di un mucha ku durante di operashon siman pasá a fayesé den hospital.

Minister di salubridat sra. Susy Camelia-Römer a konfirmá pa EXTRA ku el a keda notifiká pa Inspektor General di Salú, dr. Kely ku a instalá e tim en kuestion. E tim ta konsistí di tres persona i tambe un hurista. Nan tin di hasi e investigashon rondó di morto di e mucha di 11 aña.

Parlamentario Giselle Mc William a aserká minister di salubridat pa hasi investigashon kiko a bai robes durante operashon di un mucha di 11 aña ku a kousa su morto. E investigashon ta pasobra e dòkter ku lo a realisá e operashon ta unu ku resientemente tabatin yen kos dudoso rondó di dje.

E dòkter aki algun luna atras tabatin basta konmoshon kuné den hospital. Hasta t’asina ku hospital a manda e dòkter aki ku vakashon pa algun dia, pero despues el a regresá hospital. Aparentemente ta papia di un diagnóstiko robes ku a hasi ku e hobensito aki, i dor di kual a hasi e operashon ku konsekuensia fatal. Awor investigashon di e tim ku ta konsistí naturalmente di dòkternan mester determiná kiko a sosodé eksaktamente.