WILLEMSTAD.- E Tim Multidisiplinario mester a sera un bar restorant dor di molèster di músika, pero tambe el a faya ku su pèrmit di negoshi.
Den deklarashon pa EXTRA, sr. Ronny Cornelis a bisa ku gobièrnu ta duna pèrmit pa tur hende ku ta hasi petishon pa un negoshi i ta kumpli ku e kriterionan pa haña pèrmit. Pero kada negoshi tin reglanan stipulá den su pèrmit na kual e tin di tene su mes.
Un negoshi den su afan pa generá entrada no por ni mag di bira molèster pa otro ni por ta den violashon di kondishon di pèrmit. E siudadano tambe tin derecho di ta “rustig” den su kas.
Komo mantenshon di órden tin di garantisá ku kada propietario i negoshi ta kumpli ku reglanan stipulá. Pasobra mesun derechi ku e negoshi tin pa generá su entrada, e siudadano tambe tin su derechi di ta trankil den su kas.
Prestige Bar situá na Kaya Charles Maduro djamars dia 22 di yüni, despues ku e Tim a risibí keho di e área di músika duru, e tim di mantenshon di órden a konstatá esei tambe. A splika e señora kargadó dje petishon di pèrmit ku e no por tin músika animadó, solamente músika di fondo, pasobra e ta un bar restorant i no diskotèk. Hende ta bin na e bar pa sinta kome, por deleitá nan ku músika, pero unu di fondo. No por t’asina ku te riba kaya ta tende e músika ta zona. E músika ku ta toka no por ta di tal índole ku e ta stroba bario di drumi, kaminda tin hende tin di sali for di nan kas, bai drumi na kas di famia dor di molèster di músika duru, esei no por. E reglanan stipulá den e pèrmit tin di kumpli ku tur.
Sr. Cornelis a bisa ku ta p’esei huntu ku polis lo bai aktua severamente di inkumplimento di reglanan den e pèrmit di kada hende. Despues di pandemia ku tur hende a sufri di un manera òf otro, tin di komprondé ku tin di kumpli ku lei. E pandemia aki mester ta un lei pa nos. Nos tabata hasiendo hopi kos robes, kosnan a bai “scheef”, e pandemia a bira un lès pa trèk tur kos règt i tur hende ta responsabel pa kumpli ku loke ta spera di nan.
No por tin un bar restorant ku teras i for di e teras por ehèmpel ta músika ta zona. E no ta bai. Esaki ta konta pa tur negoshi.
Finalmente sr. Cornelis a bisa ku e Tim Multidisiplinario lo bai kontrolá hopi skèrpi den kuadro di kumplimentu i molèster pa bario.