WILLEMSTAD.-EXTRA a tuma nota awe djasabra ku e tim di prekario ta riba kaya ta midi i marka terenonan. Manera ta konosí pa algun aña kaba ta struktura e forma kon hendenan ta para pa wak marchanan di karnaval. Di e forma aki ta sòru pa e ta mas strukturá i asina dunando espasio na kada hende i grupo ku ke forma nan ambiente kantu di kaminda.

Den kombersashon ku sra. Noriza Gerard lider di e tim di prekario el a duna di konosé ku nan a eksperensia un tardansa chikitu ya ku ta for di algun dia pasa nan mester a kuminsá. A tarda un poko pa e ‘bestelbon’ ta kla pero nan a surpasá tur eseinan.

Tambe el a ekspresá gratitut pa e tim ku ta trahando den e proyekto aki. Tur ta hendenan ku trahando dediká i ta hasi tur esfuerso pa e prosesonan kana lihé. Nan a traha hopi duru pa resolvé e retonan di aña pasa. Gerard ta enfatisá ku e ta trahando duru pero hopi satisfecho, hopi orguyoso di su tim.