WILLEMSTAD.-  Representantenan di Kuerpo Polisial i di Ministerio di Hustisia, tabata di bishita na Sentro di Bario Montaña, na unda tabatin un enkuentro ku representantenan di bario pa papia tokante di e situashon di kiebro den kas i negoshi den Bándariba.

Ya pa algun tempu kaba, polisnan di bario di Bándariba ta den kontakto estrecho ku representantenan di barionan den Bándariba, pa yega na fórmulanan kon atendé ku e kasonan di ladronisia den kas i den negoshi.

Durante di e enkuentro na e sentro di bario, e diferente representantenan di bario a duna presentashon di kiko nan mes huntu ku abitantenan a hasi, pa asina yuda frena aktividatnan kriminal den nan bario.

Tambe nan a trese dilanti situashonnan ku nan ta kere ku gobièrnu i otro instansianan mester duna un man, pa asina hasi nan bario mas sigur.

Manera entre otro, mas i mihó iluminashon di kaya, habrimentu di mondinan na unda malechornan ta skonde pa vigilá kasnan bandoná i tambe roinan shushi.

Barionan ku a keda representá, tabata Montaña, Montaña Rei, Lang Leven, Brakkeput, Lagunisol, Chincho, St. Joris, Cas Grandi i Rooi Santu.

Den kuadro di e esfuerso grandi aki ku abitantenan ta hasi, Kuerpo Polisial asumiendo su responsabilidat a kuminsá djaluna dia 5 di yüli 2021, ku un tim dediká na atendé kasonan di ladronisia den kas i den negoshi prinsipalmente den e área di Bándariba.

E tim aki a keda reforsá pa personal di reshèrshi i polis di warda di Montaña mes, ku tin komo ophetivo, pa baha e kantidat di kasonan di kiebro i mantené esakinan abou.