WILLEMSTAD.- Te na e alturanan aki por bisa ku Aqualectra ta konfrontando un kantidat di 73.000 florin na ‘claim’ di diferente índole. Ademas Aqualectra ta den e fase final pa bini ku un proposishon pa kompensá henter komunidat na momentu ku surgi un interupshon den suministro di koriente. Esei EXTRA por a komprondé for di un deklarashon an Minister di Desaroyo Ekonómiko, sr. Steven Martina, durante su presentashon pa Parlamento di Kòrsou ayera mainta. Manera ta konosí, un dje tipo di ‘claim’nan ku sa ser hasí hopi serka e kompania ta relashoná ku aparatonan doméstiko ku ta daña na momentu ku tin interupshon den suministro di koriente. Sa sosodé ku un òf mas aparato ta daña na momentu ku koriente bini bèk. Pero tin ‘claim’ di kompanianan tambe ku ta hiba pèrdida presisamente pa motibu di falta di suministro di koriente. Algun siman pasá mes poor a nota ku komo konsekuensia di un ‘black out kon den un supermerkado tabata saka un kantidat di produkto for di frizer i rèki pa motibu ku tabata eksistí e peliger ku nan a daña.

Durante e reunion aki di komishon sentral tin parlamentario ku a puntra si no por instalá telefòn ku number permanente pa e konsumidó por haña informashon riba loke e ke sa i riba posibel claim ku e por hasi. Ta trata aki dje number di telefòn 0800-0135. E liña aki ta grátis pa tur yamada i ta disponibel 24/7. Operadornan di e sentral aki lo por duna e kliente tur informashon nesesario pa por atendé asuntunan ku tin di haber ku Aqualectra.

Energia solar:

Pa loke ta informashon riba energia solar, e minister a splika ku Aqualectra a tene un destaho públiko kaminda kompanianan internashonal lo por inskribí pa suministro di koriente via di panelnan solar. E proseso aki ta andando i ta spera ku lo por anunsiá e ganadó dje destaho aki durante e promé mitar di 2021.

E tipo di koriente aki lo bai forma parti di e meskla den suministro di koriente di Aqualectra. Ta trata aki di un planta di 20 Mw.

Kompensashon:

Tin parlamentario ku a puntra si no por introdusí un periodo di grasia pa esnan ku a sufri daño òf si nan por ‘claim’ pa dañonan ku nan a sufri. Segun sr. Martina, tin henter un prosedura si ku e kliente mester kana.

Pa loke ta e parti di kompensashon, e por bisa ku Aqualectra ta den e fase final pa bini ku un proposishon pa e inkumbiniensia ku e ‘black out’nan a kousa. Pero lo ta un fórmula dependiendo dje periodo di interupshon i tambe dependiendo dje tipo di kliente, si ta doméstiko òf komersial.

Pa loke ta e kantidat di ‘claim’ te awor tin alrededor di 1017 ku e kompania tin di atendé.

Aqualectra no tin un seguro pa paga ‘claim’ i komo tal ta e kompania mes ta kubri esaki for di su propio fondonan.