WILLEMSTAD.- Tin basta plaka di belasting di sushi riba kaya. Un 40 porshento di kasnan ku ta ser faktura ku un rekargo pa sushi no ta paga esaki, i te ainda SER no por komprondé dikon no ta kobra e sèn aki. No ta hustu pasobra asina ta hinka Selikor den problema. Asina e entidat ta bisa den un konseho ku el a duna riba un proyekto di lei pa kambio dje lei di belasting di sushi. Esnan ku ta tras dje inisiativa di lei aki ta proponé pa duna eksonerashon na esnan ku ta tira sushi na gran eskala pa evitá tiramentu di sushi den forma ilegal na lugánan aislá. Pero na opinion di SER, e no por mira un motivashon dikon ta relashoná tiramentu di sushi ilegal ku eksonerashon.

Segun SER den e struktura di kasnan i tambe e situashon di entrada lo por surgi kambio atrabes di tempu, i pues pa evitá ku por hasi mal uso, SER rekomendá pa anualmente hasi un evaluashon di e kuestion di dunamentu di eksonerashon di pago di belasting di sushi.

Esnan ku a entrega e inisiativa di lei aki ta proponé pa baha e tarifa pa tiramentu di sushi na landfill di fl. 30.- pa fl. 15.- pa 1.000 kg.

Pero segun SER, lòs for di e falta di un splikashon ku lo tin un relashon entre e tarifanan i tiramentu di sushi ilegal, e tin di konstatá ku for di 1996 tempu ku e lei a drenta na vigor no tabatin indeksashon dje tarifa pa tiramentu di sushi na landfill, siendo ku esaki ta posibel den e mesun lei. SER ta di opinion ku e adagio di ku ‘esun ku ta susha ta paga’ ketu bai ta válido, sigur si tene kuenta ku kasnan na Kòrsou tin e espasio pa tira 1.000 kg di sushi grátis na landfill banda di e sushi ku Selikor ta rekohé tur siman, i ku e loke ta ser kobrá ta akseptabel.

Den e mesun rosea SER ta bisa ku e ta haña ta nesesario pa tin un investigashon aktualisá riba e gastunan real di tiramentu di sushi i e desaroyonan riba merkado. Naturalmente e lo ta ménos kostoso pa komunidat si e tin di skohe entre pago pa tira su sushi afó òf si Selikor ta tuma esaki pa su kuenta. Pero ta bale la pena pa investigá e posibilidat ei.

SER ta bisa ku, di e kasnan ku si ta ser kobrá, tin un 40% ku no ta paga e belasting di sushi. Pero pa SER no ta muchu kla dikon e rekargo aki no ta ser kobrá. Pa SER defakto ta trata aki di un situashon no deseabel si apénas 60% di siudadanonan ku realmente tin di paga e belasting ta paga esaki. I e entidat ta kere ku mester bini kambio den esaki rápidamente. Na momentu ku tin un grupo grandi di siudadano ku no ta paga e belasting ta pone ku e gastunan pa prosesá sushi ta bai kai riba lomba di esnan ku si ta paga, pues defakto nan ta pagando di mas pa e servisio ku nan ta risibí. I tur esaki ta hinka Selikor den problema pa kumpli ku su obligashonnan.