WILLEMSTAD.- Universidat di Kòrsou (UoC) dia 31 di ougùstùs ta organisá un simposio relashoná ku investigashon tokante e peso di mayornan na Kòrsou ku tin yu(nan) den enseñansa di fundeshi; esaki yama  ‘Ouderbelasting’. Dr. Odette van Brummen-Girigori a hasi hopi investigashon na e tópiko pa ‘Foundation Fair Educational Chance (FFEC)’ i tambe UoC. Algun luna pasá Van Brummen-Girigori a entrega rapòrt di investigashon tokante ‘Ouderbelasting’ na minister di Enseñansa, Siensia, Kultura i Deporte. Despues a papia diferente bia ku ministerio, pero tambe ku skolnan. Van Brummen-Girigorie, den un entrevista ku EXTRA, ta bisa ku den e último periodo e tabatin kontakto ku diferente skol ku ta tuma e tópiko hopi na serio. E investigashon a mustra na un manera sistemátiko kuantu peso e mayornan ta eksperensiando guiando nan yu(nan) hùiswèrk, kua ta e problemanan ku nan ta eksperensiá i kon tur esaki ta relashoná ku e bienestar di mayornan. Van Brummen-Girigori: “Pa hopi mayor e trabou ku nan ta hasi pa guia nan yunan ta di mas. Diferente direktiva di skol ta realisá esaki i nan a aserka mi pa deliberá tokante esaki.” Den e rapòrt Van Brummen-Girigori ta duna diferente konseho pa baha e kantidat di trabou ku mayornan ta eksperensiá. “Tin mayornan ku ta logra. Pero pa un kantidat grandi di mayornan e guiansa ta hopi difísil. Pasobra nan no tin e konosementu pa yuda òf nan ta falta tempu. Tin mayornan ku ta paga pa ‘huiswerkbegeleiding’ pa nan yu, pero esaki no ta posibel pa tur mayornan. Esaki tin komo resultado ku tin ‘kandongelijkheid’ den enseñansa na Kòrsou.”

Segun Van Brummen-Girigori hopi skol ke kambia esaki. “Mayoria di e skolnan no sa presis kon nan por kambia esaki. Mi a papia ku diferente skol kaba. Despues nos a disidí na UoC pa organisá un simposio pa nos por papia ku hopi mas hende.”

Durante e simposio rector Francis de Lanoy lo hiba palabra i tambe Susan Larmonie-van Heydoorn, sekretario general di ministerio di Enseñansa, Siensia, Kultura i Deporte. Van Brummen-Girigori i  Raily Goedgedrag di Inspekshon di Enseñansa lo duna un presentashon. Despues lo tin diskushon ku pènel i lo tin oportunidat pa hende bin ku pregunta. Simposio ta organisá den Aula di universidat entre 14 i 17 or. Entrada ta grátis. Hende por mèldu nan mes via www.uoc.cw/ouderbelasting.

PORTRET

...Dr. Odette van Brummen-Girigori...