WILLEMSTAD.- Tin ekselente notisia pa esnan ku ta humadó di sigaria. Esaki pa motibu ku pronto lo bai tin riba un merkado un sistema revolushonario pa huma pero ku ta minimalisá bo riesgonan pa kualke malesa ku tin relashon ku humamentu. Ta trata aki dje sistema i teknologia konosí “Heated Tobacco” ku a keda desaroyá pa e kompania Philip Morris International. En konekshon ku e teknologia nobo aki EXTRA a hiba un entrevista eksklusivo ku Prof. Manuel Peitsch kende ta e sientífiko prinsipal ku a dediká su tempu na e siensia tras di Heated Tobacco. I tur e investigashonnan ku ta ser hasí i e miónes di dòler ku ta ser invertí ta ku un meta: Pa redusí e riesgo pa dañonan kousá dor di sigarianan konvenshonal.

Den deklarashon pa EXTRA prof. Peitsch a splika ku e konsepto aki ku ta kai bou di e nòmber di IQOS ta pa adulto i e ta un mihó alternativa kompará ku sigarianan konvenshonal. E vishon ta pa bai remplasá sigarianan konvenshonal ku produktonan ku ta ménos dañino. Den un mundu liber di huma lo tin mester di produktonan ku no ta kima tabako, pasobra e loke e tabako ei ta produsí ta kousa di malesa. Pues e tim di Philips Morris ku e ta enkabesá a pensa pa produsí produktonan ku ketu bai por ser inhalá dor di e humadó. “Nos tin mester di teknologianan ku ta kalentá tabako en bes di kim’é”, asina el a splika. I e teknologia ku a keda desaroyá básikamente ta enserá ku ta kalentá e tabako na un temperatura mas abou ku e loke ta usa pa sende sigarianan konvenshonal, pero tòg sufisientemente haltu ku e ta kousa evaporashon di nikotina i smak dje tabako.

E ta redusí bo riesgo di forma signifikante. Ta trata aki di un aparato spesial den kual bo ta hinka un bara di sigaria kòrtiku den dje. E bara di sigaria aki ta bai pega riba un pènchi ku ta bai kalentá e tabako manera el a splika. Pero e kayente ta di tal forma regulá ku e ta sufisientemente pa humadó haña e sensashon di ta humando un sigaria normal.

E aparato mes tin un sistema den kual e temperatura nesesario ta ser regulá outomátikamente. Philip Morris International ta e pionero den e tipo di teknologia aki ku huntu ku “e-cigarettes” tambe ta kai bou di IQOS. EXTRA mester bisa ku nos a keda impreshoná ku e konsepto aki, ku e sistema aki.