Aruba ta mantené frontera será

WILLEMSTAD.-E siman aki a tuma lugá un reunion, na nivel tékniko, entre funshonarionan di Kòrsou, Aruba i Venezuela pa papia riba e situashon di frontera será entre e paisnan. Manera ta konosí algun tempu pasá Venezuela a sera frontera ku Kòrsou, loke a kousa basta problema pa nos merkadonan. Entretantu a buska otro alternativa pa bida sigui. Den kombersashon ku minister presidènt Eugene Rhuggenaath el a konfirmá ku e reunion a tuma lugá na nivel tékniko. Segun sr. Rhuggenaath, tin disponibilidat di parti di Venezuela pa yega na palabrashonnan, pero mester sigui dialogá.

Ta bon pa enfatisá ku nunka Kòrsou no a sera frontera ku Venezuela, ta gobièrnu venesolano a tuma nan desishon. Riba e pregunta di EXTRA kon e situashon ta pa loke ta trata frontera, minister presidènt a bisa ku Korsou i Aruba ta reuní bastante regular pa deliberá riba e asuntu aki. Den kaso di Aruba ta konosí ku minister presidènt Evelyn Wever-Croes a tuma desishon di sera frontera ku Venezuela i despues di e reunion di e siman aki asta a disidí na prolongá e desishon pa mantené frontera di Aruba será pa Venezuela.