WILLEMSTAD.- Awe miembronan di Curaçao International Financial Association (CIFA)ta eligí un presidente nobo. Manera EXTRA a informá den su edishon, e tèrmino di Anuschka Cova komo presidente a pasa kaba. Ta for di oktober 2018 sra. Cova mester a baha, pero a base di petishon di gobernantenan el a disidí na keda un tempu kòrtiku pa kaba di atendé algun detaye importante. Sinembargo e presidente di CIFA a keda insistí riba miembronan pa postulá nan mes pa asina haña dirigentenan nobo den e organisashon. Tin dos kandidato ku a postulá nan mes komo presidente di e organisashon, ku ta tuma lugá den elekshon awe djaweps. Banda di esei CIFA tin mester di 3 miembro di direktiva nobo.

Cova su tèrmino di 4 aña komo presidente a pasa, i awor aki ya kaba e ta den su di sinku aña. El a enfatisá ku e no por keda mas statutariamente i pa tal motibu ta esensial pa miembronan postulá nan mes komo miembro di direktiva.

Den kombersashon ku sra. Cova el a indiká ku direktiva ta duna sosten na Giovanny Pieternelle. Anuschka Cova a sirbi komo presidente di CIFA, despues di un trayekto di 20 aña den sektor finansiero internashonal, trahando pa e multinational Citco. Komo presidente di CIFA e mester a pone su kompania un banda pa dediká 100% na CIFA.