WILLEMSTAD. - Durante e seshon di informashon tokante e Lei di Estado di Emergensia, ku a tuma lugá ayera ku miembronan di prensa skibí, sra. Nathalie Samson Konsehero Hurídiko di Gobièrnu di Kòrsou a trese algun aspekto interesante dilanti.

Un di e puntonan ku a hala atenshon, ta un remarke di un artíkulo ku a keda publiká resientemente den ‘Caribisch Juristenblad’, kaminda ku dos hurista aki na Kòrsou a analisá e medidanan tumá den kuadro di COVID-19

E huristanan ta realisá ku gobièrnu tin e tarea primordial pa aktua i salvaguardá salubridat públiko, pero nan ta duda ku   tur e medidanan tumá ta korekto i tin nan base legal.

Aktualmente gobièrnu di Kòrsou ta aktuando a base di e lei di órden públiko i ta aktuando pa defendé e komunidat su salú i pa evitá ku e COVID-19 ta sigui plama.

Pues Gobièrnu ta hasiendo kos ku defakto mester di mas base pa ehekutá medidanan i p’esei mester bin ku entre otro e Lei di Estado di Emergensia pa gobièrnu por aktua legalmente.

Na momentu ku e lei keda aseptá dor di parlamento artíkulo 28 den e lei aki ta bisa ku si den un situashon di krísis eksepshonal manera aktualmente Kòrsou ta pasando aden i si disidí di ehekutá e lei di Emergensia, nunka ta posibel pa trapa derechi di niun siudadano.

Pues Samson a splika ku hustamente e lei aki ta duna mas protekshon na e siudadano, si e lei aki pasa parlamento.

No ta asina ku e lei ta hiba komunidat atras, pero ta duna gobièrnu e espasio pa e aktua.

Por ehèmpel artíkulo 28 ta bisa ku bou di ningun kondishon gobièrnu por desviá for di e derechonan fundamental di un komunidat.

Awor aki, un di e derechonan ku ta keda trapá pero esei ta basá  riba salvaguardá salubridat, ta e derecho di un hende por move liber.

Gobièrnu ta pidi e hendenan pa keda kas, pero esaki ta algu ku defakto mester di un lei pa regla esaki, pues un lei riba nivel di mas haltu manera un  “Landsverordening”. Pero aktualmente gobièrnu ta pidi hendenan keda kas a base di un dekreto ministerial’.

Pues pa esaki e lei aki ta krea un a base legal pa gobièrnu por aktua legalmente.

Di e forma aki Samson a mustra riba vários aspekto di lei ku e lei di emergensia lo regla den un forma legal sin tacha e derecho di e siudadano.