WILLEMSTAD. -Asuntunan Públiko (Kranshi) di e Ministerio di Maneho di Gobernashon, Planifikashon i Servisio Públiko ta anunsiá ku ta adaptá temporalmente e periodo di entrega pa promé biaha i renobashon di reibeweis.

Personanan ku for di 1e di òktober 2020 a pasa eksámen práktiko ku éksito por manehá adishonalmente shete (7) luna un vehíkulo ku ta pertenesé na e kategoria(nan) ku el a pasa eksámen. E mester tin e resultado di eksámen práktiko den su poder.

Tur reibeweis ku a kaduká for di 1e di òktober 2020 ta haña prolongashon di shete (7) luna mas di balides, kuminsando e dia ku el a kaduká. Pues tur persona ku nan reibeweis a kaduká despues di 1e di òktober 2020, por keda kore ku e reibeweis kaduká ei pa shete (7) luna mas. Esaki no ta konta pa esnan ku nan reibeweis a keda suspendé òf tumá bèk pa outoridat.

No por usa e reibeweis ku a kaduká komo medio di identifikashon i solamente reibeweis optené aki na Kòrsou ta haña e prolongashon temporalmente di balides. Reglanan normal ta keda apliká pa esnan no optené na Kòrsou.

Asuntunan Públiko di e Ministerio di Maneho, Planifikashon i Servisio Públiko ta hasi su máksimo esfuerso pa atendé tur su klientenan mas mihó posibel i ta traha ku e mes fervor na satisfakshon di siudadanonan. Pa mas informashon semper por tuma kontakto ku Bentana di Informashon na Lokèt di Pèrmit na e number temporal ku ta 434-1690.