WILLEMSTAD.- Gobièrnu a disidí ku e lo bai revisá e lista di gruponan ku ta ser konsiderá komo vital den komunidat, ku e intenshon di baha e kantidat aki ya ku notablemente tin muchu hende i outo riba kaya. Esei di akuerdo ku Promé Minister di Kòrsou sr. Eugene Rhuggenaath durante un enkuentro ku prensa e siman aki. T’asina ku meskos ku aña pasá gobièrnu a krea un lista di entidat i gruponan ku ta ser konsiderá komo vital den e situashon di pandemia aki. Mester bisa ku e mandatario tin rason ya ku ta kuestionabel en bèrdat si tin tantu hende asina ku ta kai bou di vital i si nan mester ta riba kaya den e mesun instante.

Es mas, asta por kuestioná e plachi di dia, ku opviamente ta lagando e mesun interogante. I aki tambe gobièrnu tin intenshon di trese adaptashon. E situashon aktual pa loke ta plachi di dia ta kompletamente diferente for di loke tabatin aña pasá.

Gobièrnu ta bai minimalisá e eksonerashonnan ku a keda duná. E kantidat aki lo tin di baha ya ku ta yegando un kantidat di 30 mil petishon, ku ta hopi. Tin muchu hende riba kaya!, segun Rhuggenaath. Pero gobièrnu lo bai evaluá i disidí ta kua ta e funshonnan ku ta ser konsiderá komo vital, i pronto lo por spera algun anunsio ku ta bai redusí e eksonerashonnan ku a ser duná kaba.

Sr. Rhuggenaath a bolbe hasi un yamada dramátiko na komunidat pa kumpli ku e medidanan, pasobra apesar di e situashon krítiko ku tin pa nos hospital nos mester usa nos sentido komun i laga kada un di nos hasi loke nos por. Keda kas i kuida! Ta di mas bisa ku mester bisti tapaboka, evitá di duna otro man, mester laba man, i ta kosnan ku nos a bin ta praktiká pa mas ku un aña kaba. Ta importante pa sigui mantené e disiplina tambe di mantené distansia sosial. I si bo ta sali kas, hasi esaki solamente pa asuntunan esensial, si tin di kumpra komestibel, botika, dòkter òf vakuná. Tur sobrá kos lo tin di warda un ratu.

Aktualmente nos ta den e periodo di Siman Santu i tradishonalmente pueblo sa bai pasa dianan di plaser na Bándabou huntu ku famia i amigunan. Pero e biaha aki esei lo tin di keda posponé òf kanselá. No lubidá ku ta prohibí pa bai playa. Tur esnan ku a plania nan “staycation” lo por kanselá esaki, aunke e sa ku ta duru. E mes a plania esaki pa pasa huntu ku su famia i el a disidí di kansel’é pa duru ku e lo por ta pa su yunan.