WILLEMSTAD.- Komo konsekuensia di pandemia di Corona Korporashon pa Desaroyo di Kòrsou, Korpodeko, tin hopi mas trabou. Asina direktor (‘managing direktor’) Chesron Isidora di Korpodeko a bisa EXTRA. Isidora ta splika ku ora tin proyektonan ku ta un tiki mas ‘challenged’, ku tin mas riesgo, semper ta aserká Korpodeko. Den e tempu di Corona mas hende ta aserká e banko di desaroyo. ‘Nos ta haña muchu mas posishon. Nos tin hopi mas di atendé, sin konta ku nos ta suheto na regulashon. Pero nos ta haña hopi mas di e proyektonan. Ademas ku instansia di desaroyo bo ta funshoná anti-síkliko. Ora nos tin un bahada di ekonomia, e ora ei nos ta haña muchu mas aktividat pa nos por kontribuí te asina leu ku bo por. Den periodo ku ekonomia ta bai mucha mas mihó, komo Korpodeko nos ta konsentrá muchu mas den áreanan nobo pa desaroyá.’
Isidora ta splika ku ta realidat ku komo konsekuensia di pandemia di Corona i e situashon ekonómiko ku Kòrsou ta den, e fundashon tin hopi mas trabou. ‘Nos tin trabou ku nos klientenan ku ta eksistente i klientenan nobo ku nos ta haña. Ku ta nifiká ku ta un periodo èkstra drùk pa nos.’
Segun e direktor di Korpodeko tin hopi hende ku ke hasi uso di e oportunidat pa por digitalisá, pa nan por reorganisá nan negoshi. ‘Tambe ta mira hende te ainda ku ta kere den e oportunidat den un bahada asin’aki. Nan ke kuminsá ku nan negoshi, pasobra nan ta sigui kere ku ekonomia ta bai drecha. Meskos ku nos ta hasi.’ Segun Isidora nan ta kere ku ora situashon ta pasa, nan lo ta den un posishon pa hasi bon probecho di un ekonomia ku ta kresiendo. ‘Ku ta nifiká ku nos ta haña sufisiente posishon.’
Korpodeko ta splika ku hopi hende a pèrdè trabou komo konsekuensia di pandemia di COVID-19. Ku tin komo konsekuensia ku hende ta buska un oportunidat nobo pa sigui nan bida. I nan no ke sinta warda riba un doño di trabou nobo. Komo konsekuensia Korpodeko ta mira ku hopi ta saka nan idea i nan ta aserkando Korpodeko pa yuda nan i guia nan. Korpodeko no ta yuda solamente finansieramente, pero tambe ta yuda e hende pa nan por haña un entrada nobo.