WILLEMSTAD.-  Ayera durante Santu Sakrifisio di misa pa konmemorá Dia di Labor, pastor Curtis Meris a indiká ku e úniko manera ku selebrashon di e misa aki por haña sentido i balor, no solamente pa e dia di ayera, pero pa tur dia di nos bida.

E úniko forma kon e misa aki por penetrá den nos kurason, ta ku nos no ta selebrá e misa aki komo un tradishon, pero un biaha mas komo un oportunidat pa enkontrá Dios. I den enkuentro ku Dios nos no ta bini pa pidi Dios, pero na promé lugá pa Dios forma nos. P’asina ei ni maske kua trabou ku nos tin, ta un trabou ku por balorá, pero den nos trabou Señor su formashon por hasi nos bira hende di sabiduria.

Meskos ku evangelio, loke a asombrá e hendenan ta ku e echo ku Hesus tabatin un trabou ku pa nan tabata konosí, pero apesar di esei, i apesar di ta yu di un karpinté, Hesus tabata un hende di sabiduria.

Konstantemente den nos enkuentro ku Dios, i diferente selebrashon kaminda e palabra di Dios ta keda prediká, Señor su úniko meta ta pa laga nos bira hende sabí i pa komprondé tambe kiko e sabiduria ta nifiká.

Loke ta hopi great ta ku e  selebrashon Dia di Obrero ta tuma lugá nèt den e temporada ku ta selebrá Pasku di Resurekshon.

Pastor a sigui bisa ku ora el a tende e palabra sabiduria, el a pensa kon forma i diferente manera ku Hesus a ekspresá su sabiduria.

Hopi biaha hende tin e tendensia di bai deskubrí e sabiduria únikamente den loke Hesus a papia, pero si bai un tiki mas leu por deskubrí e sabiduria den  e forma kon Hesus a aktua.

Hesus tantu promé i durante i despues di su morto konstantemente tabata forma su disipelnan, i tabata duna nan enseñansa i instruí nan. E no tabata simplemente instruí nan pa ta hendenan ku por papia duru  i bisa esaki òf esaya, pero Hesus tabata forma su disipelnan pa nan motivashon ta kuadra ku e boluntat di Señor. Pasó si dado momentu nan motivashon no ta kuadra ku boluntat di Dios, ni maske kuantu bunita bo akshon por mustra, pero si bo motivashon di paden no ta kuadra ku e boluntat di Señor, bo motivashon di pafó ta keda inaseptabel pa Dios. Por ehèmpel mi por yuda mil i un hende, pero si mi úniko motivashon ta pa nan mira kon grandi mi ta, e motivashon ei ta laga mi akshon di pafó pa bunita ku e ta mustra i negoshi ku e ta mustra ta laga e akshon bai pèrdí. Pasobra ta loke ta biba den mi kurason, loke ta moldea di paden ta loke ta sali pafó ta kuadra ku boluntat di Dios. Hesus ke forma nos pa nos motivashon ta kuadra ku boluntat di Dios.

Pa nos ta Kristiannan berdadero, pasobra ta hopi Kristian sin Kristu ta kana rònt i sinta den posishonnan demasiado klave den e komunidat aki. Demasiado Kristian ta karga e nòmber Kristian, pero dor ku nan motivashon ta robes nan paden ta sin Kristu. P’esei ban deskubrí huntu ku otro kua tabata e formashon ku Hesus a duna su disipelnan en partikular despues di su resurekshon, pastor Curtis Meris a duna di konosé.