WILLEMSTAD.- Pronto lo bai tin 16 mion reservá pa por drecha kaya i otro aktividatnan públiko. Den e situashon ku nos tin aktualmente por papia di défisit. Konkretamente por ehèmpel, e luna aki gobièrnu di Kòrsou tin un défisit di 10 mion florin. Ta un situashon den kual no por papia di spar. Den e situashon aki Hulanda ta esun ku ta sosteniendo nos ku likides. Kòrsou a pidi 187 mion, pero tin 168 disponibel ku lo bai den dos ‘tranche’.

Sra. Ersilia “Zus” de Lannooy den deklarashon pa prensa a splika ku den e loke gobièrnu a pidi komo sosten a inkluí tambe plaka pa hasi invershon. Gobièrnu por hasi invershonnan for di su propio presupuesto. Pa e parti di invershon gobièrnu tin presupuestá un suma di 101 mion florin, pero tin outorisashon pa usa 19 mion florin, di kual 16.1 mion lo bai pa e ministerio di VVRP, pues pa drecha kamindanan etc.. Mas aleu tambe tin sumanan mas chikí reservá pa por kumpra òf drecha kòmpiuter etc.

Otro partinan ku tin bista riba dje pa usa pa invershon lo mester bini for di plakanan ku a drenta komo resultado dje benta di UTS. E aña ki gobièrnu lo mester risibí alrededor di 39 mion for di dje. E plaka a keda repartí di tal manera ku pa luna lo por hasi uso di mas o ménos un 3 mion florin pa hasi invershon. Awor dor ku e invershonnan mester ta den konkordansia ku e Landspakket, esaki mester bai kompañá si ku un plan di implementashon. Dor ku e plan ei no ta eksistí ainda, e konseho di CFT tabata pa aplasá e invershonnan ei pa mas lat den aña.

Mas aleu sra. de Lannooy a splika ku tin 1.3 mion florin reservá pa rekapasitashon di hendenan ku a pèrdè trabou for di aña pasá. Pero e plan ei lo mester a bini for di e ministerio di MEO, ku tampoko a kristalisá, pues a rekomendá pa aplasá esaki tambe. Pues pa e próksimo kuartal lo no tin e invershon ni rekapasitashon.

Di su parti Minister di Finansa drs. Javier Silvania a splika ku tin biaha sa tin plakanan reservá riba presupuesto bou di e pòst di Servisio di Kapital, i si gobièrnu no usa e plaka ei e ta pèrd’é. Pero den kuadro di esei resientemente Minister Charles Cooper a sinta ku Sekretario General di e Ministerio di Finansa pa wak di ki forma lo por usa e sèn ei tòg. I lo bai usa e sèn ei pa drecha kamindanan. Tin di usa e sèn sino gobièrnu ta pèrd’é!