WILLEMSTAD.- Tin retraso den entrega dje edifisio di Hospital Nobo na Otrobanda (HNO) òf mihó bisá Curaçao Medical Center (CMC). For di komienso di aprel e edifisio kompleto mester a keda entregá, pero ainda esaki no a sosodé debí ku ainda sierto tèstnan no ta keda hasí, ta loke ku sr. Gilbert Martina direktor di HNO “Transitie en Exploitatie” N.V. a duna di konosé na EXTRA.
Sr. Martina a indiká ku tin un retraso dor ku Ballast Nedam ku a hasi konstrukshon dje hospital, no a hasi tèst ku mester keda hasí. Ta trata aki di tèstnan eléktriko, mekániko, i hidróuliko.
E tèst tin di keda hasí dor di diferente kompania lokal bou di supervishon di un kompania ulandes ku ta responsabel pa kontròl di kalidat di konstrukshon. E kompania aki ta hasi e kontròl si e resultado ta konforme spesifikashon di e konstrukshon.
Martina a indiká ku lo tin un fecha tentativo pa entregá e edifisio, pero no ta divulgá esaki debí na akuerdo ku Ballast Nedam.
A base di e plan ku tabatin pa ku entrega di e edifisio, for di luna di mart i aprel mes mester a kuminsá hasi e simulashon pero tin retraso. Tin di haña e edifisio kompletamente na disposishon pa por start.
Pa loke ta trata inventario ku mester bai den e edifisio nobo, Martina a indiká ku esaki ta plania pa sosodé den luna di yüni i yüli. Lo instalá tur inventario i esnan médiko tambe.
Sinembargo ta keda di fokus pa e hospital por ta operashonal pa fin di aña i ta bai hasi tur kos p’esei tuma lugá.
Finalmente sr. Martina a bisa ku ainda mester basha un parti di SEHOS abou, pa pro konstruí e kaminda ku ta bai pega na e rotònde patras di Hospital nobo. Igualmente mester kita e pòmp di gasolin di Curoil ku tin na Colon aktualmente.
Den desèmber ku EXTRA tabatin kombersashon ku sr. Martina a indiká ku a planifiká ku Ballast Nedam pa medio desèmber por kuminsá haña algun departamento. Ta kuminsá haña e ala “Blou”, kaminda e druktank ta, e parti Lila kaminda e stulnan di dialisá ku ta ala D, ta haña parti mei mei ku ta e Atrium, kaminda e resepshon ta. I ta haña e departamento H3, kaminda ariba tin departamento di mucha, tin kuido intensivo, tin poli abou i kushina.
Mediano febrüari ta haña dos otro ala B i C, e parti mei mei kaminda Kamber di Operashon ta i e promé parti kaminda ambulans ta drenta, i radiologia.
Dia 2 di aprel 2019 Ballast Nedam a indiká ku lo a entregá HNO i ku téknikamente tur kos ta funshoná. Sinembargo manera nos a indiká ariba ainda sierto tèst no a ser hasí pa entregá e edifisio.

DCIM100MEDIADJI_0025.JPG