Antisipando ku skol lo no habri djaluna awor:

WILLEMSTAD.- Tin skolnan sekundario ku ya a manda karta pa mayornan di alumnonan notifikando nan ku posiblemente skolnan lo no habri djaluna awor. Sierto skolnan a traha henter un roster kon ta sigui duna lès tòg pa e alumnonan no mester kai muchu atras. Asta pa esunnan ku no tin e forma kon pa sigui lès pa medio “online”, skolnan ta buskando solushon pa esei tambe. Awe lo tin un rueda di prensa ku lo elaborá riba e aspekto aki.

Den un nota kòrtiku di parti di e sindikato di maestronan di skol SITEK, Presidente Lio Plantijn ta indiká ku semper tin fórmula pa yuda e muchanan pa logra lo nesesario. Plantijn ta mustra riba e echo ku enseñansa a stanka rònt mundu i esaki sigur kaminda e alumnonan ke sigui.

Pero no mester kita for di bista ku e variashon di COVID ku tin aktualmente ta kana mas lihé i ta pega mas lihé i ta mata mas lihé. A kuminsá vakuná, pero ainda mester bai di dos ròndu di vakuna. Plantijn ta di opinion ku a lubidá riba shofùr ku ta transportá e muchanan ku ta e promé kontaktonan.

E trahadó den skol, shofùr, e trahadó den fundashonnan di enseñansa ta mesun siudadano ku tur hende i ounke ku ke habri skolnan, pero mester evaluá esaki promé.

Esaki ta trese kuné ku tur probabilidat skolnan lo no habri djaluna awor.

KAP ku tin su alumnonan na pechu, a traha henter un programa kon lo sigui den e dianan benidero.

Por ehèmpel mirando e echo ku skol lo no bai habri, tur prueba lo keda suspendé te un otro aviso. E direktiva di e skol ta enkurashá e alumnonan pa usa e tempu aki pa sigui praktiká na kas. E echo ku no tin prueba, no ta un karta blanku pa no hasi nada. Esaki ta krea e espasio i por usa e tempu aki pa kada alumno  studia e materianan i puntra nan dosente riba puntonan ku ainda nan mester di klaridat.

Pues e maestronan lo sigui invertí den e alumnonan p’asina por tin un aña eskolar ku éksito. Esta lo buska alternativanan pa por generá sifra pa e alumnonan.

Manera menshoná lèsnan lo sigui segun nan roster “online” via Zoom. Kada alumno mester registrá  via di un link ku nan ta haña i asina por sigui e lèsnan i tin kontakto ku dosentenan di kada lès. Ta pidi pa esnan ku no tin e posibilidat aki pa mas pronto posibel buska kontakto ku skol pa buska un solushon.