WILLEMSTAD.- E sospechoso E. C. den e kaso ku a haña e nòmber di Valencia ta dip den problema. Esaki ta saliendo na kla ku investigashonnan ku ta keda hasi. Manera ta konosí djabièrnè siman pasa wes komisario a husga e detenshon di L.L. i E.C. i a prolongá e detenshon di E.C. i a laga L.L. den libertat. E kaso a haña e nòmber di Valencia i ta trata di akusashonnan di entre otro falsifikashon di dokumento, korupshon atministrativo i mal uso di funshon komo ámtenar. E sospechoso aki ta empleá na e servisio di Imigrashon konosí komo TO (Toelatinsorganisatie).
Pero mientrastantu a prohibí entrada na e ofisina di e servisio aki na otro empleado den e kaso aki e mènedjer di ofisina. EXTRA a komprondé ku hustisia a tende vários di e trahadónan i esakinan komo sospechoso.
Ta un tenshon enorme tin na e servisio aki, ku ta duna un servisio importante na komunidat. I awor ta manera kosnan ta stanka ya ku tur hende ta wak otro den e ofisina.
Relashoná ku e kaso Valencia EXTRA a komprondé ku ta sumanan kuantioso tabata ser paga pa pèrmit di ekstranheronan. I spesífikamente chinesnan ta esnan ku tabata paga sumanan hopi grandi pa nan pèrmit. Tin sospechoso i asta pruebanan fuerte kontra E.C. ku a yuda kontra pago hopi chines yega na nan pèrmit di estadia i di nan famia.
Loke tambe ta ser investigá segun EXTRA su informantenan ta konstrukshon di un edifisio ku aparentemente ta riba nòmber di E.C. pero ku e trahadónan tabata chinesnan.
E.C. komo hefe di e servisio aki so no por a saka e pèrmitnan, ounke esaki ta parse di a sosodé su riba su enkargo. I p’esei investigadónan den e kaso Valencia tin un grupo grandi di trahadó na e servisio aki tambe komo sospechosonan ounke nan no a keda detené.
Komunidat i enpartikular negoshantenan ku ke establesé na Kòrsou ta sintiendo efekto kaba di e investigashon Valencia, ya ku proseduranan ta bayendo tranka. Esaki segun nos informantenan hopi yega serka di e servisio aki ta debí ku trahadónan ta duda ta ken si òf ken no ta metí.