WILLEMSTAD.- Gerensia di Ennia ta un tiki preokupá ku loke ta pasando den komunidat.  Ultimo tempu nan por a nota ku tin un oumento den kasonan froudulento. Asina e COO di Ennia, sr. Reinald Curiel RA a duna di konosé na apertura di e simposio di Ministerio di Hustisia riba prevenshon. Por sierto, Ennia ta un dje kolaboradornan di hopi tempu ku e ministerio aki pa loke ta proyektonan preventivo den bario etc. Pa e simposio aki Ennia a bolbe duna su granito pa a hasi posibel e bishita di un gran profeshonal den materianan di prevenshon riba tereno kriminal den persona di dr. Wendell Wallace.

Biniendo bèk riba e intervenshon di sr. Curiel, durante su disertashon el a bisa ku e tin un preokupashon ku e lo ke kompartí ku esnan presente, esei ta ku último tempu por a nota un oumento den kasonan di froude. Ta trata aki di klientenan ku ta fabriká òf simulá un daño pa despues por bai reklamá nan sèn serka kompanianan di seguro.

Segun Curiel, e ta kere ku e úniko manera ku por frena kasonan froudulento ta si tin un koperashon estrecho entre e kompania di seguro i e kadena hudisial. Aktualmente e kompania aki ta den kombersashon ku Kuerpo Polisial pa wak kon huntu por kombatí e fenómeno aki. Pero ta bon pa tur hende ta konsiente ku kasonan di froude ta un menasa serio pa e esensia di seguro, ku ta e prinsipio di solidaridat. No mester lubidá ku ora ta trata di un seguro, ta nos tur ta pone sèn huntu pa ora un persona sufri daño, e sèn dje otronan ta yud’é pa paga e daño ku el a sufri.

Seguridat na Kas:

Un proyekto ku Ennia lo kuminsá pronto ku UTS ta e proyekto di “Home Security” kaminda lo instalá sistemanan teknológiko den kas di su klientenan. Aki e kliente por baha su prima ku uso optimal di su sistemanan. E intenshon ta pa aserká barionan pa di e forma aki protehá barionan kontra aktonan di kriminalidat.

Segun sr. Curiel, dje forma aki e kier ilustrá kon Ennia ke duna su kontribushon na prevenshon ku e meta general pa oumentá seguridat na Kòrsou. Pero prevenshon i seguridat no ta responsabilidat solamente di gobièrnu, pero di sektor privá tambe.