WILLEMSTAD.- Minister-presidente Gilmar ‘Pik’ Pisas djaweps último durante konferensia di prensa di gobièrnu di Kòrsou a splika ku ‘tin un skarsedat enorme di polis’. Pisas: ‘Los di esei polis tin ku dil ku hopi kos.’ Minister-presidente a splika ku na momentu ku bo ta habri despues di un ‘lockdown’ òf un toke de keda ‘tur lokual ku no a sosedé ta kuminsá di sosedé bèk.’ Pisas a splika ku esei ta pone ku polis tin ku atendé ku hopi kaso. I esei ta trese kuné ku pa loke ta trata ‘handhaving’ tin ménos tim. ‘E timnan ku tei awor aki ta hasi kontrol na establesimentunan.’ Pero segun Pisas no tin sufisiente polis pa hasi tur trabou na e momento aki.
Den un investigashon ku a tuma lugá fin di aña 2020 Konseho pa Mantenshon di Lei (RvR) a konkluí kaba ku kuerpo di polis na Kòrsou ta falta personal. Tambe RvR a konstatá ku e opstákulo prinsipal ku Tim di Atrako na Kòrsou a enfrentá ta falta di material.
Pisas mes a bisa ku un otro problema grandi relashoná ku polis ta fondonan pa polis ta hopi limitá. Ku tin su efekto negativo pa e trabou èkstra ku polis tin ku hasi. ‘E kantidat di oranan èkstra ku nan a traha, ta surpasá tur presupuesto ku e pais tin te ainda’, Pisas a bisa durante konferensia di prensa.