WILLEMSTAD.- Tiramentu di sushi den forma indeskriminá i ilegal ta un doló di kabes ku Selikor ta konfrontá ketu bai. Di akuerdo ku un relato anual di Selikor pa loke ta aña 2016, e kompania a rekohé sushi na rason di 2.286 tòn, kual tabata kasi kuater biaha mas tantu di loke a ser rekohé e aña anterior. Segun e relato, den 2016 un biaha mas a limpia un kantidat di sitio di tiramentu di sushi ilegal. En total a rekohé 2.286 tòn di sushi ilegal (2015: 624 tòn). E limpiamentu di sitionan di tiramentu di sushi ilegal desafortunadamente tambe ta parti di e pakete di servisio di saniamentu ku ta ser ehekutá riba enkargo di gobièrnu. Echo ta ku tiramentu di sushi den forma ilegal ta kresiendo.

E trabou di limpiamentu di sitionan ilegal ta ser hasí parsialmente dor di Selikor mes i un otro parti a ser ofresé na kontratistanan. Mas aleu den 2016 Selikor a duna su kontribushon na inisiativanan partikular dor di duna e organisashonnan akseso grátis pa tira sushi afó. Den 2016 e kantidat di sushi ilegal a krese di un forma eksorbitante. E kos di mas lamentabel ta ku por konstatá ku e sitionan ku ser limpiá ta ser sushá rápidamente atrobe. Pero e limpiamentu di sitionan ilegal di tira sushi a keda un reto pa Selikor. Dor ku no ta enforsá lei no ta tuma sufisiente medida di represhon dor di e instansianan kompetente pa asina kontrarestá tiramentu di sushi den forma ilegal.

Mantenshon di roi

Mantenshon di roi labadónan den bario ta un responsabilidat di Servisio Públiko. Pero pa esaki Servisio Públiko tin un akuerdo ku Selikor ku ta hasi e trabou kontra pago. E departamento di Material Peligroso, Berpùt i Kloaka ta enkargá ku e diferente trabounan di mantenshon preventivo i kurativo ku mester ser hasí riba e infrastruktura ku ta akapará awa di shelu i awa sushi.

Na 2016 mester a habri un kantidat di 1.725 roi ku tabata verstòp. Un kantidat a ser someté na trabounan di mantenshon preventivo. Kompará ku e aña anterior tin mas trabounan preventivo a ser hasí na roinan. Tabatin un mihó kordinashon ku Servisio Públiko. Pa loke ta e kantidat di meldunan, por papia aki di un desaroyo stabil.