UPDATE: Tiroteo na altura di Weto ku dos morto

WILLEMSTAD.- Un ratu pasa sentral di polis a haña informashon di un kaso di tiramentu ku a tuma lugá na Weto, unda mester tin un aktividat ku grel. Por a nota dos ambulans a bai na e sitio pa despues move ku hopi urgensia den direkshon di Otrobanda. Informashon preliminar ku EXTRA ta disponé di dje ta indiká ku un òf mas sospechoso lo a yega na e sitio i los bala. Posiblemente a trata na tira un atrako, pero segun informashon preliminar un polis na sivil tabata na e sitio i a respondé e tiramentu di e malechor òf malechornan. Mas detaye den edishon di EXTRA.

Update

Komunikado di Polis

Djadumingu 7 di aprel 2019 alrededor di 13.08’or, Sentral di Polis a risibí yamada di un kaso
di tiramentu ku a tuma lugá na Weto na altura di un minimarket.
Mesora a dirigí diferente unidat na e sitio.
For di investigashon preliminar a sali na kla, ku probablemente algun hòmber lo a yega na e
sitio i a kuminsá lòs algun tiru dirigí riba un hòmber.
E hòmber aki lo mester a kuminsá kore, pero a bin kai abou ku tiru den kabes na e otro
banda di kaminda.
Un otro hòmber ku tambe tabata na e sitio, lo a risibí herida di bala.
Ámbos víktima a keda transportá ku ambulans pa poliklínika pa tratamentu médiko.
Despues di esaki, e vehíkulo den kua esnan ku a tira tabata, a huí bai for di e sitio. Na e
momentu ei, un agente polisial na sivil a lòs tiru dirigí riba e outo aki.
Algun ratu despues okupantenan di e vehíkulo último aki lo mester a atraká un dama riba
un kaya den serkania di Cocori i bai ku su vehíkulo.
Mas lat, un otro outo a bin baha un hòmber ku herida di bala, prosedente di e tiroteo aki,
na poliklínika. E hòmber aki a keda detené komo sospechoso den e kaso aki.
Pa mas o menos 3.30’or’or di atardi a drenta informashon na Sentral di Polis ku dos di e
víktimanan ku tabata enbolbí den e tiramentu na Weto a fayesé.
Ta trata aki di Ulrich Christopher Cresencia de Pablo, nase na Kòrsou, 9 di yüli 1989 i
Shurijon Jovino Christopher Noor, nase Na Kòrsou 16 di desèmber 1985
Alrededor di 14.48’or Sentral a risibí notifikashon ku na Fortuna Abou lo mester tin un
vehíkulo ku perforashon di bala.

Ta investigando pa sa, si e kaso aki, tin relashon ku esun di Weto.

SHARE

LEAVE A REPLY