WILLEMSTAD.- Ya ta konosí ku dia 30 awor e dekreto ministerial ku ta papia entre otro tokante medidanan pa ku COVID-19 i tambe Toke de Keda ta vense.

For di fuentenan ku EXTRA ta disponé di dje, nos por a komprondé ku ya kaba tur esnan envolví a reuní pa asina deliberá kiko ta bai bira e siguiente paso.

Aparentemente a yega na e akuerdo ku Toke de Keda lo keda.

A bini dos opshon riba mesa; sea mantené toke de keda awor aki ku e speransa ku sifranan lo baha i despues kita esaki pa desèmber, òf kita toke de keda awor aki i pone esaki bèk den luna di desèmber.

Tur esnan envolví a skohe pa e promé opshon kual tabata mantené Toke de Keda pa por lo ménos 2 siman mas.

Ounke ku di otro banda lo kuminsá de-eskalá un tiki den e área di Farándula den airu liber.

Esnan envolví ta monitoriando henter e situashon aki ku hopi koutela debí ku Gobièrnu no ta deseá pa komunidat pasa un temporada di fin di aña i kambio di aña “den kas”.