WILLEMSTAD. - Resientemente Minister di Desaroyo ekonómiko Sr. Ivan ‘Steven’ Martina, tabata di bishita serka Luis Curiel durante e “Podcast” Louie Louie Talks” ku ta keda transmití riba e plataformanan di EXTRA, kaminda ku Minister a splika ku e preshon ku tin riba su kartera den e temporada di pandemia COVID-19 ta enorme.

Minister a splika ku un di a faktornan ku ta krea hopi preshon, ta  e echo ku tin e espektativa ku un minister por hasi milager. Pero esei simplemente no por, pa motibu ku desaroyá un ekonomia ta un proseso i no un milager.

Martina a splika tambe e sla ku ekonomia ta sufri durante un ‘toke de keda’. Pa duna un impreshon,  Martina a splika ku ta bisto ku e ‘toke de keda’, a kibra hopi kos den un ekonomia i pa krea e situashon bèk, ta tuma hopi tempu.

E sla ta duru i hopi hende ta buskando solushon i alternativa i nan ta wak den direkshon di minister. Martina a mustra ariba ku, ni maske kuantu espektativa tin, ta kosnan ku e no por kumpli kuné, pa motibu ku e espektativanan ta ireal.

Esakinan ta aspektonan ku ta pone hopi preshon riba e trabou di minister.

Minister Martina a splika ku siendo den e situashon aktual, e ta purba tòg yuda mas tantu ku ta posibel. Pero komo minister, di tur forma e ta purba atendé tur hende mas tantu posibel den e forma korekto i mustra tambe unda mester bai buska e solushon. Martina a splika ku e solushon tei, tin plannan riba mesa, pero esei no ta bai di awe pa mañan. Esaki ta bai a base di planifikashon.

Otro aspekto ku tambe ta sòru pa hopi preshon ta e arena polítiko ku ta agresivo, sigur ku e preshon di oposishon.

Un aspekto ku ta hala atenshon na opinion di Martina, ta e kantidat di partidonan polítiko ku a lanta. Tur e partidonan aki mester skor i haña atenshon i un di e maneranan mas fásil pa logra nan meta, ta kritiká esunnan ku ta den gobièrnu, e último aki sin mas tambe ta sòru pa un preshon enorme, Martina a enfatisá.