WILLEMSTAD.- Ton Maan ta próksimo Prokurador General pa Kòrsou, St. Maarten i islanan BES. Konseho di Minister di Reino riba proposishon di e ministernan di Hustisia di Reino a ratifiká su nombramentu durante e reunion di awe, djabièrnè 22 yanüari.

Maan no ta un deskonosí pa e islanan den Karibe. El a fungi entre 2015 i 2017 komo fiskal mayó di Ministerio Públiko St. Maarten. E tin eksperensia amplio trahando pa un Ministerio Públiko.

El a kuminsá su karera na 1989 komo fiskal na e “parket” di Utrecht, Hulanda. Entre 1989 i 2015 el a okupá diferente funshon den Ministerio Públiko i na 2011 a bira Fiskal mayó suplente kua funshon el a okupá te ora el a bai St. Maarten.

E tabata e úniko kandidato rekomendá na Konseho di Minister di reino pa e funshon di Prokurador General pa Kòrsou, St. Maarten i Islanan BES. Esaki despues di a pasa un proseso ekstenso di solisitut i “assessment”.

Maan ta aktualmente ta fiskal di reshèrshi (“rechercherche officier”) na Functioneel Parket na Hulanda. (Foto sxmgovernment.com)