Residente kompletu bakuná no mester PCR ora di regreso

WILLEMSTAD.- Premier demishonario Eugene Rhuggenaath a informa komunidat di suavisashon di medidanan ku ta na vigor den kuadro di esfuersonan pa kontrolá Covid. Premier Rhuggenaath a enfatisá ku ta na un manera responsabel pero sigur por suavisá e medidanan di protekshon di komunidat.

Entrante djarason 2 di yüni próksimo ‘toque de queda’ ta kuminsá 1’or di mardugá i ta stòp 4:30 di mainta. Tur establesimentu por brinda servisio segun nan pèrmit pero mester sera mas tardá un ora delantá ku e orario di ‘toque de queda’ pa asina tur hende i trahadónan por yega kas na tempu.

Bon kuné i bingo tambe por tuma lugá atrobe, te na un maksimo di 50% di kapasidat di e lugá. Naturalmente mester sigui mantene reglanan di Covid manera distansia sosial. E kantidat maksimo di hende ku por sinta huntu na un mesa den restorant ta keda anulá, pues for di djarason e regla ei no ta konta. Trùk di pan por operá for di 8’or anochi te 12’or.

Enkuentronan na kas por tuma lugá te na un maksimo di 25 persona i ta pidi tur hende keda korda pa mantene tur regla di higiena i preferibel tene aktividatnan ei den airu liber. Pakusnan tambe por operá sin restrikshon di kantidat di hende.

Pa loke ta trata biahamentu; Premier a anunsiá ku residentenan di Kòrsou ku tin mas ku dos siman ku nan a bakuna kompletu i nan ta regresá for di eksterior, nan no mester pasa PCR test mas na momentu di regresá Kòrsou. Den kaso ku ta regresá for di un pais di rísiko haltu mester hasi e antigen test despues di 3 dia ku yega Kòrsou. Entre e islanan Aruba, Boneiru i Kòrsou biaheronan no mester di PCR test ni antigentest mas entrante 3 di yüni próksimo. Mas detaye den edishon di EXTRA.