WILLEMSTAD.-Minister Presidènt Gilmar Pisas a anunsiá medidanan ku su gobièrnu a tuma pa di e forma ei trata na kontrarestá e oumentu di kontagionan di Covid i e preshon ku esaki ta pone riba hospital ku ya kaba no tin sufisiente personal pa atendé ku pashèntnan.

E promé medida ta introdukshon di ‘toque de queda’, kuminsando 11’or di anochi djabièrnè awor 13 di ougustus. Tur dia e ‘toque de queda’ lo ta di 12’or di anochi pa 4:30 mainta.

Ta bini ku reglanan mas skèrpi pa loke ta trata kantidat di bishitante na aktividat i eventonan publiko. No ta permití baliamentu na niun aktividat, ni den niun lokalidat. Pa loke ta trata restorant, pakus, tienda i kasino esakinan por sigui operá segun e orario indiká den nan pèrmit, pero no mas lat ku 1 ora promé ku ‘toque de queda’. Ku otro palabra tur mester ta sera pa 11’or mirando ku ‘toque de queda’ ta kuminsá 12’or anochi.

Trùk di pan ta bai bek na e medida anterior di kuminsá operá 7’or anochi i pa ‘beachclubs’ a pone kantidat maksimo di 100 persona ku distansia físiko  i no ta permití baliamentu ni muzik duru, ademas mester registrá tur bishitante. Mas detaye den edishon di EXTRA.