Medidanan mas severo pa kontené kontagio Covid

WILLEMSTAD.-Despues di algun dia ku e kantidat di kasonan positivo di Covid a subi bastante, awe premier Rhuggenaath a anunsiá medidanan mas severo den e esfuerso pa kontené e kontagio na Kòrsou.

Premier a bisa ku si e kantidat di kasonan aktivo a yega 400 ta nos komportashon. Ta nos mes komportashon ta e problema. Ta parse ku nos hendenan a slèk ku e reglanan i medidanan. No ta pasaheronan ku ta bini for di eksterior, pero e kontagio ta entre nos mes hendenan. Premier a hasi apelashon serio ku si no tin motibu pa ta riba kaya, keda kas. Traha for di kas kaminda por i asina evitá ku tin hopi hende riba kaya.

E medida mas fuerte anunsiá ta ku entrante mayan djaluna 16 di novèmber “toque de queda” ta drenta na vigor for di 9’or anochi. E durashon ta pa 3 siman!

Tapaboka tambe ta bira obligatorio den supermerkado, mini market, funerario, trahadónan na ofisinanan kaminda no por tene distansia i varios otro mas. Na skolnan muchanan den klas bou di 19 aña no mester bisti tapaboka ni e maestro di skol. Hende ku ta bai skol pa hasi limpiesa, esnan ku ta bai bishita dosente, pero tambe maestronan di skol den “koffiekamer” nan si mester usa tapaboka.

Mas detaye den edishon di EXTRA.