DEN HAAG.- E ‘toque de queda’ ta keda na vigor na Ulanda tanten, asina korte di apelashon a disidí. Mas tempran na Ulanda korte a bai di akuerdo ku petishon di e fundashon ‘Viruswaarheid’ ku a pidi korte pa revoka e ‘toque de queda’, mustrando riba diferente aspekto ku segun e fundashon gobièrnu ulandes no a tene bon kuenta kuné. Pues den e promé veredikto korte a disidí ku mester stòp ku e ‘toque de queda’ na Ulanda. Segun korte den promé instansia no tin asuntu di urgensia.

Korte a indiká ku e ‘toque de queda’ ta keda na vigor tanten ta warda e desishon den korte di apelashon. Sinembargo djis despues di e desishon aki a drenta petishon di protesta kontra di e wes, esaki a bini di un abogado i tambe representante di e grupo di protesta ‘Viruswaarheid’. Den un desishon di ‘wrakingskamer’ mas lat a disidí ku e wesnan ku a trata e kaso por sigui hasi esaki pasobra no tin motibu pa duda den nan imparsialidat. Pues ‘toque de queda’ na Ulanda ta keda na vigor.

Premier Mark Rutte den un komentario a hasi apelashon na komunidat ulandes pa kual sea e desishon di korte pa no bai move riba kaya despues di 9’or anochi. Mas detaye den edishon di EXTRA.