WILLEMSTAD.-  Servisio pa Obra Públiko (OW) ta anunsiá ku entrante awe djaluna 5 di febrüari, e kontratista DCG Services ta bai hasi trabounan na e lusnan di tráfiko na altura di krusada Arubastraat / Frederickstraat / Hoogstraat.

Lo kambia e lusnan di tráfiko pa hasi nan LED. E trabounan ta kuminsá awe djaluna 5 di febrüari te ku 9 di febrüari. Lo traha entre 8.30’or pa 11.30’or di mainta i di 1.30’or pa 4.30’or di mèrdia. Di e forma aki, ta trata na minimalisá e molèster pa tráfiko.

Esaki ta enserá ku e lusnan di tráfiko aktual lo ta for di servisio. Na momentu ku esaki ta e kaso, reglanan di tráfiko di un krusada ta vigente, i mester respetá bòrchinan di tráfiko.

OW ta pidi un i tur pa kore ku koutela durante e dianan aki i asina evitá aksidente.