WILLEMSTAD– Minister Charles Cooper huntu ku Servisio pa Obra Públiko (OW) ta informá ku entrante 3 di òktober, trabounan di mantenshon ta bai kuminsá riba Weg naar Willibrodus for di Williwood te ku parkeerplaats di Playa Daaibooi.
Debí na mal estado di e kaminda aki, OW ta bai hasi trabounan di mantenshon riba e karetera. E trabou aki ta konsistí di raspa i kita asfalt bieu, i pone un kapa di asfalt nobo. Esaki ta forma parti di e proyekto ‘Life Extension’ ku Minister Cooper a anunsiá ku ta kontinuá.
E trabou aki lo keda repartí den 2 fase: Fase 1 ta e parkeerplaats di Daaibooi, i fase 2 ta e kaminda Weg naar Willibrodus for di Williwood te ku promé ku yegada di e parkeerplaats Daaibooi.
Kontratista Aliansa ta enkargá ku ehekushon di e trabou aki. Fecha pa kuminsá ku e trabounan di asfaltamentu aki ta 3 di òktober, i lo tin un durashon di 7 siman.
Durante ehekushon di e trabounan aki, abitantenan i negoshinan ku ta keda den e kaya aki por por yega nan kas òf establesimentu normalmente. Pa otro outomobilistanan ku sa hasi uzo di e karetera aki, lo tin ruta alternativo indiká ku barínan oraño i bòrchinan.
OW ta hasi un apelashon na tu outomobilista pa kore ku koutela.
