WILLEMSTAD.- Minister Charles Cooper huntu ku Servisio pa Obra Públiko (OW) ta informá ku trabounan di mantenshon ta bai kuminsá riba Weg naar Westpunt for di St. Cruz te ku Lagun.

Trabounan ta inisiá riba djaluna 3 di òktober 2022 i lo tin un durashon di mas o ménos 2 siman i mei. E kontratista Ortela Schoonmaakbedrijf en General Contractor lo drecha e kaminda mirando ku esaki ta den un mal estado.

Durante ehekushon di e trabounan, lo sera e kaminda di St. Cruz na altura di Hòfi Mango te ku Lagun. Pa e bishitantenan di playa Lagun, Kenepa, Jeremi, i bisindario, lo desviá tráfiko  via di otro partinan di Weg naar Westpunt. Lo tin bòrchinan ku lo indiká esei.

OW ta pidi pa tur outomobilista kore ku koutela i ta gradisí adelantá pa e komprenshon.