WILLEMSTAD.- Manera nos a anunsiá siman pasá, e trabounan pa drecha i renová Sha Capriles Kade a kuminsá. E trabounan ta enserá pone mosaiko riba e tonbanknan i tambe den nan banda.

Ta for di 2018 a kuminsá ku trabounan pa renová e kade aki. Sha Capriles Kade ta un waf ku ta karga un balor fundamental den nos sentro di siudat; sigur komo atrakshon turístiko, pero tambe pa e merkado lokal komo un merkado aksesibel kaminda nos pueblo por akudí pa kumpra fruta, berdura i piská fresku. Un kantidat di 15 tonbank ya a risibí mosaiko durante e trayekto di renovashon miéntras e otro 15 tonbanknan ainda no a keda kla.

E trabounan akí ta planiá pa sosodé di 11 di yüni 2021 pa 30 di yüni 2021.

OW ta pidi pa tur hende ku ta frekuentá den e área pa tuma nota ku tin trabounan di mantenshon tumando lugá.

Por lo pronto, lo sigui usa Sha Capriles Kade pa benta di fruta, berdura, kos di boka dushi i artesania lokal. Kunukeronan lokal ku ta interesá pa okupá un di e puestonan na e waf, por tuma kontakto libremente ku Fundashon Marshe pa mas informashon.

Na momentu ku tin mas klaridat tokante eventual regreso di e barkunan venezolano, lo adaptá e plan aktual pa por ubiká algun di e barkunan atrobe. Sinembargo, ta e intenshon ku lo aseptá ménos barku venezolano ora ta asina leu di moda ku por mantené e espasio pa produktor i bendedónan lokal por sigui bende na e waf.