WILLEMSTAD. - Relashoná ku trabounan di mantenshon i reparashon, na e momentunan aki tin un skarsedat di silendernan di gas di 20 liber. Esaki Bosero di Curoil/Curgas Sabine Curiel a duna di konosé na redakshon di EXTRA.

Ta trata di trabounan di mantenshon riba tereno di refineria Isla ku ta tuma lugá regular i pa motibunan imprevisto, ainda e stashon di yena gas di 20 liber no ta den operashon.

Tur kos ta indika ku awe e trabounan lo konklui i ku mañan, esta djawpes, ounke ku ta un dia liber, Curoil/Curgas lo sòru pa tur hende ku no a logra haña gas por kumpra gas.

Mester indika ku e otro stashonnan ku ta yena gas di entre otro 100 liber i tankinan grandi pa entre hospital i otro negoshinan ta kanando normal.

Esaki ta un situashon temporal ku pa den kurso di mañan e situashon pa ku silendernan di gas di 20 liber lo ta normal atrobe.