WILLEMSTAD. - Relashoná ku e Oumento di kasonan di trafikashon di hende na 2017, Ministerio Públiko Kòrsou a laga traha un rapòrt titulá (Venezuelan “Tragomeisjes”: Curaçao’s Secret Import).  For di enkuesta a sali na kla ku damanan ku a keda enkuestá a splika ku nan a bin Kòrsou promé biaha di un forma legal ku avion. Tabata numa ora di deportashon ku nan tabata bin bèk pa medio ilegal ku boto via laman. Esaki ta pone ku den 2018 Ministerio Públiko Kòrsou ta bai aktua fuertemente kontra e forma di katibu moderno aki.

Trafikashon di hende ta enserá entre otro reklutá, transportá i prosedé/negoshá, kontra di e hendenan su boluntat ku e meta pa nan ser eksplotá seksualmente, eksplotá pa medio di trabou òf otro forma di eksplotashon.

Na Kòrsou víktimanan hopi biaha ta konosí komo “tragomeisjes”. Otro sektornan ku mundialmente ta konosí pa trafikashon di hende i tambe na Kòrsou, ta den konstrukshon, turismo i horeka.

Trafikashon di hende ta nifiká duna entrada di un forma ilegal na hende. Mayoria biaha e meta final di trafikante òf kontrabandista di hende ta pa probechá finansieramente di e situashon.

P’esei banda di trafikashon di hende, Ministerio Públiko Kòrsou, a traha na tambe intensivamente riba kontrabanda di hende.

Manera ya menshoná den 2017 tabatin un oumento drástiko di trafikashon di hende, kompará ku añanan anterior. Na aña 2015 a hiba 4 kaso Korte di hustisia. Na 2016 2 kaso i na aña 2017 na tur 14 kaso a keda tratá di kual 9 a bai Korte. Sinku kaso di 2017 lo bai Korte na 2018.

Ministerio Públiko tabata eksitoso den hiba e kasonan aki Korte, entre otro ku kasonan grandi manera “De Rode Leeuw” (2009), “Victoria” (2014), “Race Café” (2013) i “Bandera Grill” di 2016 ku na 2017 a bai Korte.

Ta p’esei Ministerio Públiko  Kòrsou ta aktua severamente kontra kontrabanda di hende.