WILLEMSTAD.- Entrante djaluna 24 di yanüari 2022, un persona mes por traha su sita pa kùr su vehíkulo ‘online’ for di su ‘smartphone’ òf for di kualke lokalidat.

Esaki ta un parti mas di e afan pa digitalisá. Ministerio di Tráfiko, Transporte i Planifikashon Urbano huntu ku ministerio di Maneho di Gobernashon, Planifikashon i Servisio Públiko ta lansa e posibilidat nobo akí. Pronto usuarionan lo por bishitá e portal di gobièrnu ku ta www.gobiernu.cw i klek riba e kuadro “Kùr bo vehíkulo”. Un otro posibilidat lo ta pa bai Lokèt Digital, skohe lèter K (Keuring Voertuigen) i klek riba e link sitaautokeuring.gobiernu.cw.

Mester remarká ku e posibilidat pa traha sita pa kùr un vehíkulo sea via meil, telefónikamente òf personalmente na bali ta keda eksistí temporalmente.

Pa kualke informashon adishonal por yama Lokèt di Pèrmit, departamentu Bentana di Informashon na 434-1690 òf manda un meil na sita@gobiernu.cw.