WILLEMSTAD.- Ayera mainta polis mester a bai na ofisina di SVB na Otrobanda pa duna asistensia despues ku a drenta notifikashon ku un empleado di SVB a kuminsá ku un akshon. E trahadó a pone su outo na entrada pa stroba entrada di vehíkulonan, tambe tabatin vários partinan di betòn grandi i pisá na e salida di e lugá di stashoná outo. Polisnan a yega na e sitio pa papia ku e señora. EXTRA tabata presente i a tuma nota ku ta trata di un señora di sierto edat i ta un persona ku konosé e reglanan bastante bon. Asta el a hala atenshon di polisnan riba sierto punto. Manera ta konosí gobièrnu a tuma desishon ku trahadónan den institutonan di gobièrnu mester entregá 12.5% di nan salario/entrada komo parti di nan kontribushon na e situashon ku Covid a trese kuné. Despues di tempu parlamentarionan, ministernan i diferente otro ku a entregá 12.5% a rekobrá loke nan a pèrdè. Sinembargo den kaso di SVB ainda tin diskushon kon mester solushoná e parti aki. E señora a splika polisnan ayera mainta ku ya kaba hopi tempu a pasa, tur otro ku a entregá 12.5% ta hañando nan sèn bèk i trahadónan di SVB so ta keda atras. Ku e akshon aki e señora ke logra ku e proseso ta kuminsá kana bèk pa asina trahadónan en general i e mes partikular ta haña su benefishinan pèrdí bèk. Mas aleu EXTRA a komprondé ku e trahadó aki i algun mas no falta muchu pa baha ku penshun i si sosodé ku no regla e redukshon di 12.5% promé ku nan baha ku penshun nan tin miedu ku nan ta pèrdè e benefishinan aki pa semper.

Den un promé komentario, gerensia di SVB a bisa ku bèrdat un persona a tene un akshon reklamando benefishinan pèrdí den añanan tras di lomba. E kaso ta den korte despues di e promé veredikto den kua trahadónan a pèrdè e kaso kontra desishon di gerensia di SVB.

Direktor Phillip Martis a informá EXTRA ku ya kaba tin desishon ku e aña aki SVB lo introdusí e benefishinan bèk, pero esei ta konta di awor pa dilanti i no pa e añanan ku a pasa kaba. Manera indiká e kaso ta den korte. Trahadónan a apelá desishon di korte i awor mester mira kiko ta bira e desishon di korte di apelashon. Pa loke ta trata e blòkinan grandi bashá riba lugá di parker di SVB, ta asina ku ta bai entregá keho na polis kontra e persona ku a basha e blòkinan di betòn ei. Ta un otro persona lo a kumpli ku petishon di e señora i bai basha e blòkinan na e sitio.

Segun Gregory Wilson di ABVO den e último luna a papia ku gerensia tokante esaki, pero e medida a keda para. Wilson a bisa ku gerensia no ta habrí pa argumentonan di trahadónan i sindikato.

Djaluna último gerensia di SVB a manda karta na trahadónan. Den e karta ta konfirmá e medidanan. SVB ta bisa ku gobièrnu a disidí aña pasá ku SVB mester redusí Naf 9.2 mion riba su gastunan operashonal. Esaki tin komo konsekuensia ku pa aña 2022 i 2023 salarionan di SVB lo no wòrdu indeksá i lo no otorgá oumento di salario na personal ku a haña un evaluashon positivo pa aña 2021 i 2022. Pa kolmo pago di kompensashon pa vakashon pa aña 2022 i 2023 ta keda suspendé. Asina direktor Martis ta skibi den un karta pa trahadónan. Malkontentu tokante esaki ta motibu ku e trahadó ayera mainta a pone trabou abou i a tuma kontakto ku ABVO.