WILLEMSTAD.- E akusado venezolano, Mauricio A.L.O. por ser konsiderá komo e ‘master mind’ tras di e kaso di sekuestro i homisidio ku a tuma lugá kontra e komersiante Angel Barios Rodriguez dia 8 di yanüari 2020. Esei di akuerdo ku desaroyonan den e kaso aki. Mauricio (21) huntu ku ocho (8) paisano ta ser akusá di e delito grave aki.

For di e prosèsverbal dje kaso a bini dilanti ku Mauricio tabata traha pa Angel i e tabata un persona di hopi konfiansa. Ku tempu el a fia asina tantu plaka serka Angel ku su debe a bin akumulá na mas ku 16 mil florin. Riba dia 9 di febrüari 2020 a bin topa ku un outo kimá den Dam Pretu i a bin resultá ku ta vehíkulo di Angel. Mesora a pidi su búskeda tambe, pero esaki no a duna resultado.

Pero rumornan a kuminsá kore di un posibel kaso di desaparishon, i segun investigashonnan ta andando a bin detené Mauricio komo un persona di interes, ya ku a nota ku el a lanta plaka for di kuenta di e hòmber. Siendo den man di polis Mauricio no kier a duna deklarashon, pero ku tempu el a bin rekonosé su envolvimentu i asina a bin bisa loke a sosodé.

Segun e akusado, e tabata un persona di konfiansa, pero ku tempu el a bin akumulá un debe di mas ku 16 mil florin. El a bai te serka Mgr. Secco pa wak si por likidá maske ta parti di e debe ei pero no a logra.

E tabata den un sírkulo di amigu i aki dado momentu un di nan (George O.) konosí komo Montilon dado momentu a kuminsá pidié tur sorto di informashon rondó di Angel. Asta Montilon a puntr’é e direkshon di Angel, el a bis’é sin pena ku lo tin algu malu su tras. Pero un dia bou di menasa Montilon a bin busk’é na kas huntu ku algun otro persona i asina na kas di un di nan a plania kon lo a bai sekuestrá Angel pa kita plaka for di dje. Otronan ku a partisipá den e kaso aki tabata Oscar d.l. R. alias Buri, Jose L.C. alias Papy Riki, Cheito i Jengue.

Mas aleu Mauricio a sigui bisa na polis i a konfirmá den korte ayera ku, e grupo a bai na kas di Angel, nan a sekuestr’é i bai kuné na un lugá na Montaña unda nan a menas’é i trata di fòrs’é pa  hasi un transakshon grandi pa un di nan su kuenta, loke no a sosodé. Loke si el a duna nan ta e klave pa por a lana plaka for di su kuenta personal i asina nan a logra lanta apénas fl.1.000.-.

Dor ku nan no a logra saka tantu plaka for di dje nan a bai kuné na un finka na St. Joris unda ya tabatin un buraku kobá, i dor ku e lo por a denunsia algun di nan, Montilon a duna òrdu pa bent’é den e buraku i tap’é ku tera. Por sierto, ta Mauricio mes ta esun ku a bai ku investigadornan na e sitio unda a dera e víktima. Outopsia a indiká ku a mara su pianan ku strèp di plèstik, miéntras ku tabatin un faha rònt di su garganta i su mannan. Ku tur probabilidat el a stek muri sea dor di e faha na su garganta òf e echo ku a der’é na bida.

E “Master Mind”:

Pero investigashonnan polisial i tambe deklarashon di ko-akusadonan ta mustra ku kontrali na e deklarashon di Mauricio ku a enkriminá otronan, e mes tabata e outor intelektual.

Segun deklarashon di Montilon i tambe otronan, Mauricio ta esun ku a plania henter e sekuestro. E tabata esun ku for di tempran a pidi un tal Michael pa kobra un buraku ku loader. El a primintí kada un ku a partisipá den e kaso ku nan lo a haña 20 mil florin pasobra e sa ku Angel tabatin por lo ménos un 300 mil florin.

Mauricio ta un persona peligroso ku a militá den ehérsito venezolano i no tin balor pa bida di hende. Es mas, asta e lo tabatin planiá pa sekuestrá e pareha di Angel, pero tambe un otro komersiante Omar Gil. Pa motibu ku Angel lo por a denunsiá algun di nan el a duna instrukshon pa tir’é den e buraku i bou di menasa Michael mester a tapa e buraku, i asina a dera e víktima na bida.

Mauricio tabatin e ‘token’  (mashin di transferí plaka) na su kas, loke tabata un evidensia ku e no por a Sali fo’i dje.