UPDATE: Keho kontra esun ku a bai basha blokinan di beton

Den un promé komentario gerensia di SVB a bisa ku bèrdat un persona a tene un akshon reklamando benefisionan pèrdí den añanan tras di lomba. E kaso ta den korte despues di e promé veredikto den kua trahadónan a pèrdè e kaso kontra desishon di gerensia di SVB.

Direktor Phillip Martis a informa EXTRA ku ya kaba tin desishon ku e aña aki SVB lo introdusí e benefisionan bek, pero esei ta konta di awor pa dilanti i no pa e añanan ku a pasa kaba. Manera indiká e kaso ta den korte. Trahadónan a apelá desishon di korte i awor mester mira kiko ta bira e desishon di korte di apelashon. Pa loke ta trata e blòkinan grandi basha riba lugá di parker di SVB ta asina ku ta bai entrega keho na polis kontra e persona ku a basha e blòkinan di betòn ei. Ta un otro persona lo a kumpli ku petishon di e señora i bai basha e blòkinan na e sitio.

Outo di e trahado den porta di SVB

WILLEMSTAD.-Awe mainta polis mester a bai na ofisina di SVB na Otrobanda pa duna asistensia despues ku a drenta notifikashon ku un empleado di SVB a kuminsá ku un akshon. E Trahadó a pone su outo na entrada pa stroba entrada di vehíkulonan, tambe tabatin vários partinan di betòn grandi i pisa na e salida di e lugá di stashoná outo. Polisnan a yega na e sitio pa papia ku e señora.

EXTRA tabata presente i a tuma nota ku ta trata di un señora di sierto edat i ta un persona ku konosé e reglanan bastante bon. Asta el a hala atenshon di polisnan riba sierto punto!

Manera ta konosí gobièrnu a tuma desishon ku trahadónan den institutonan di gobièrnu mester entrega 12.5% di nan salario/entrada komo parti di nan kontribushon na e situashon ku Covid a trese kuné. Despues di tempu Parlamentarionan, ministernan i diferente otro ku a entrega 12.5% a rekobrá loke nan a pèrdè. Sin embargo den kaso di SVB ainda tin diskushon kon mester solushoná e parti aki.

E señora a splika polisnan awe mainta ku ya kaba hopi tempu a pasa, tur otro ku a entrega 12.5% ta hañando nan sèn bek i trahadónan di SVB so ta keda atras. Ku e akshon aki e señora ke logra ku e proseso ta kuminsá kana bek pa asina trahadónan engeneral i e mes partikular ta haña su benefisionan pèrdí bek.

Mas aleu EXTRA a komprondé ku e Trahadó aki i algun mas no falta muchu pa baha ku penshun i si sosodé ku no regla e redukshon di 12.5% promé ku nan baha ku penshun nan tin miedu ku nan ta pèrdè e benefisionan aki pa semper. EXTRA ta pendiente reakshon di gerensia di SVB relashoná ku e kaso fèrfelu aki.