WILLEMSTAD. - Ayera anochi lat, momentu ku McDonald’s situa na Dr. Maalweg tabata preparando pa nan sera nan porta, kuater hòmber tur kara tapá i un ku arma di kandela den man ta sorprendé e trahadónan den e negoshi.

E kuater hòmbernan aki a bin pa buska plaka, pero e echo ku ya e plaka a bai, a pone ku nan no por a haña nada di sèn. Pues nan a yega lat.

Pero nan ta ranka kadena di oro for di un persona ku ainda tabata den McDonald’s.

E loke ku e atrakadónan aki a sòru p’e, ta laga e empleadonan den un shòk formal di kua un di nan a bai for di dje i a keda basta ratu for di konosementu i asta a sòru pa preokupashon di e trahadó aki.

Personal di ambulans a traha duru pa trese e empleado aki bèk na tinu.

Mester a trata por lo ménos tres trahadó pa e shòk ku nan tabata aden.

Slachtofferhulp a yega mesora pa kuminsá yuda e hendenan aki.

Informashon di testigunan ta indiká ku e atrakadónan a hui den un outo marka Toyota e modèl Vitz.

Polis a yega i investigashon ta andando.