Update akshon ADC: Trahadónan ke tende ki dia ta paga!

WILLEMSTAD.- E grupo di trahadónan di ADC ku ta na sede di ABVO ta keda den akshon. 11’or di mainta direktor di ADC sra. Lianne Virginia-Cova mes ta bai sede di ABVO pa papia. E direktor di ADC a deklará na EXTRA algun ratu pasá ku e ke papia pa yega na solushon.

Den kombersashon ku Kenneth Bremer, miembro di direktiva di ABVO enkargá ku ADC el a duna di konosé ku ABVO tabatin un palabrashon ku e direktor ku e ta manda un proposishon di pago mas tarda djamars 23 di aprel prome ku 4:30 atardi. ABVO no a haña kontesta i a palabra pa reuní ku trahadónan awe mainta. Ora nan a yega sede di ABVO a tuma nota ku e direktor a manda un proposishon ayera si, pero 5:30 pm ora ku no tin niun hende mas na ABVO. Pues segun Bremer esaki ta wega di palabra,ora ku e direktor bisa ku el a manda e proposishon ayera! Riba e pregunta di EXTRA si no por a kanselá e yamada pa akshon na trahadónan sr. Bremer a bisa ku pa kolmo loke e direktor a manda komo kontesta no ta kuadra ku palabrashonnan hasí.

Mas aleu e dirigente sindikal a duna di konosé ku tin un veredikto ku ABVO a gana na nòmber di e empleadonan riba pago ku mester sosodé. Anto awor nan ke haña klaridat ki dia ta paga i e direktor no ta duna kontesta. ABVO a reakshoná riba loke e direktor a bisa indikando ku nan ta kla pa reuní 11’or di mainta. A base di esei e direktor a disidí ku e ta bai sede di ABVO. Direktor Lianne Virginia-Cova tambe ta miembro di ABVO pues semper e ta bon bini. Bremer a enfatisá ku no por kita for di mesa ku tin un veredikto riba mesa.

 

Trahadónan ADC ku reunion bou ora di trabou na sede di ABVO

Gerensia no ta komprondé akshon: Ayera a hasi proposishon pa paga!

 WILLEMSTAD.-  Algun trahadó di Analytisch Diagnostisch Centrum, (ADC) ta den akshon i a bai sede di ABVO. E miembro di direktiva di ABVO sr. George Hernandez a konfirmá presensia di e trahadónan, indikando ku e ta reuniendo ku nan. Direktor di ADC sra. Lianne Virginia-Cova den deklarashon na EXTRA a bisa ku e no ta komprondé e akshon di e grupo di trahadó. Asta ta asina ku ayera el a hasi un proposishon kon pa paga loke e kompania mester paga trahadónan. E direktor ta lamentá ku servisio na kliente ta kai chikí miéntras ku por sinta na mesa pa papia riba tur asuntu pa yega na un solushon.

Gerensia no sa i no ta komprondé e akshon. El a bèl i a haña kontakto breve ku presidente di ABVO pasobra e no ta hañando kontakto ku e otro dirigentenan sindikal. Mas aleu el a splika ku el a mira e invitashon pa trahadónan bai sede di ABVO bou di ora di trabou, pero e lo ke haña klaridat. E direktor no sa kiko tin tras di e akshon. Tambe el a manda un mail pa ABVO informando nan ku si tin algu ku no ta kla ku e ta dispuesto na bai mes pa haña solushon.

Tambe sra. Virginia-Cova a informá EXTRA ku na vários okashon el a pidi kombersashon pasobra e tabata sa ku tin algu ta brui, pero niun hende no tabata bai mes. For di despues di e kaso den korte kaminda ABVO a eksigí kumplimentu ku sierto aspektonan laboral ta ayera e direktor a manda un proposishon pa kumpli ku pago.

 

E direktor ta kere ku mester por sinta na mesa i solushoná tur problema. E echo ku no ta duna servisio optimal na kliente ta algu di lamentá. E ke pa bai mesa, wak otro den kara i atendé ku esaki òf kualke otro problema. EXTRA ta keda pendiente di e reunion di trahadónan na sede di ABVO.

SHARE

LEAVE A REPLY